7 KA MGA SAKYANAN GI-VANDAL
2 KA MGA MENOR NGA NAGPASIRIT OG PINTAL NASIKOP
Duha ka mga menor ang ‘naluwas’ sa kapulisan human naaktohan nga nag-vandal sa pito ka mga sakyanan sa Barangay Labangon ug Tisa kagahapon sa kaadlawon.
Ang pagpang-vandal sa mga menor nakaani og mga negatibo nga reaksyon hilabi na kadtong tag-iya sa sakyanan nga naapilan og vandal.
Matod sa hepe sa Punta Princesa Police Station 10 Sr. Insp. Ian Macatangay nga mga grade 4 students ang maong mga bata nga naluwas diin nagpangedaron kini og 14 ug 15-anyos.
Gisubay pa karon nila kon aduna ba’y nagpaluyo nga fraternity tungod sa taho nga usa ka miyembro sa Alpha Kappa Rho ang kauban sa mga menor nga nang-vandal pud nga nakaikyas.
Matod sa usa sa nasikop nga bata nga naglingaw-lingaw ra sila ug mura sila og naihas mao nga nahimo nila ang pag-vandal sa mga sakyanan.
Ang mga bata residente ra usab sa Labangon diin una kining na-rescue sa mga tanod sa barangay sa wa pa gi-turnover sa kapulisan.
Tungod kay menor, i-turn over ra sila sa Department of Social Welfare and Development ug di prisohon.
Gibutyag usab ni Macatangay nga di kini ang unang higayon nga aduna’y insidente sa papang-vandal sa sakyanan sa Labangon gamit ang paint spray.
Aduna’y gitan-aw usab karon ang kapulisan kon kinsa ang nagpaluyo niining nagsige og vandal nga susama ra ang gisuwat nga vandal sa nagkadaiyang bungbong ug roll up door sa barangay ubos sa hurisdiksyon sa Punta Princesa Police.
Dugang ni Macatangay nga tungod sa pagpatuman nila sa discipline zone sa ilang kadalanan, dali na makareport ang publiko kanila aron masikop o ma-report kining mga insidente nga susama sa ingon niini. /