Once in a lifetime
Paggawas ko sa classroom sa katapusan kong subject karong hapona, naghuwat nako si Lea. Nahibulong ko kay karon pa kini mahitabo. Wa siya sa mood, klaro sa iyang nawong. Dali ko niyang gibira.
“Adto ta sa canteen, Yeng. Duna tay estoryahan.”
Hapit ko masukamod kay hapit na lang ko guyuron sa akong amiga.
“Unsaba,Lea?”Nataasangakong tingog. “Hinayhinay lang. Unsa ba kaimportante nang imong tuyo nako? Mopauli na ko, uy!”
Apan wa ko paminawa ni Lea. Nagpadayon siya sa pagbira nako. Maayo gani kay diha mi sa groundfloor sa administration building. Kon didto pa mi sa itaas, na, nangahulog na gyud tingali mi.
Gipaundayonan ko na lang si Lea. Importante gyud tingali ang iyang tuyo nako. Basig duna siyay problema.
Problema? Maproblema ba gud si Lea nga bugtong man siyang anak, ug dato ang iyang mga ginikanan.
Sa didto na mi sa canteen, misamot ang akong kahibulong kay wa man siya moorder og pagkaon ug drinks. Gidala ko niya sa usa ka lamesa nga nahimutang sa suok. Nagkusmod siya nga milingkod sa bakanteng silya. Milingkod na lang sab ko sa iyang atbang.
“Unsa ba gyuy imong tuyo nako, ha, Lea?”
“Tell me the truth, Yeng. Tinuod ba ang akong nadunggan nga gisugot mo si Nick?”
Nahikatawa ko. Nahimuot gyud ko sa reaksiyon sa akong amiga. Mora bag nakabuhat kog dakong sala niya.
“O, nganong mikatawa man, Yeng? Tug-ani ko sa tinuod?”
Miseryuso ko. Nganong limdan ko man si Lea? Angay siyang masayod sa tinuod.
“Unsa may deperensiya kon uyab ko si Nick? Yes, Lea. Gisugot ko si Nick.”
“What? Are you crazy, Yeng? Look. He’s a janitor of this university and you are a daughter of one of the successful businessmen in this city. Wa ba manglimbawot ang imong mga balhibo sa imong gibuhat?”
“So what kon janitor lang si Nick? Makaluluoy ang tawo nga nagkalisod sa pagpuyo, pero mas makaluluoy ang tawo nga way pangandoy, Lea. Look. Dunay pangandoy si Nick. Nag-antos siya sa iyang pagka working student of this school kay gusto siyang makahumag kurso ug makalingkawas sa lisod nga pagpuyo.”
Gusto kong maglagot sa akong amiga kay gi-underestimate niya ang akong boyfriend.