BATA BATOK TANIO
Sa dili pa siya modumbol sa usa ka dakong torneyo sa billiards dinhi sa Sugbo, ang bantugang bilyarista sa tibuok kalibutan nga si Efren “Bata” Reyes makigparang una og laing sumosulbong nga Sugbuanong bilyarista sa usa ka 10-ball exhibition game karong Pebrero 18 sa Jancor Billiard Hall sa dalan Manalili, dakbayan sa Sugbo.
Ning maong duwa nga gipasiugdahan sa Jancor Promotions ni Alan “Toryaw” Cortes, si Reyes makigsangka pagbalik kang Nelio Tanio, kinsa usa sa batan-ong mga bilyarista sa Sugbo nga gilaumang makakulit og dakong pangalan sa kalibutan sa billiards sa ugma damlag.
Kini maoy ikaduhang higayon nga magkakrus ang dalan nila ni Reyes ug Tanio sa usa ka exhibition game.
Sa premiro nilang sangka, si Reyes nakasugat og daghang pagpanghudlat una kini nakaposte og 25-23 nga kadaugan. Ning sangkaa, si Reyes naggunit og 9-10 nga partida.
Sa ikaduha nilang panagtagbo, wala na’y 9-10 nga partida si Reyes apan 23 ra ka mga daog ang kinahanglang irehistro niini samtang 25 ang kang Tanio.
“Mangayo man gyud na’g partida si Efren kay maglisod na man gyud siya pagdaog sa mga batan-on kon wala’y partida kay edaran na man sab gud siya,” matod ni Cortes, kinsa maoy tag-iya sa Jancor Billiards Hall.
“Daghan na man gyud maayo nga billiard players pero wala pa lang mailhi.”
Si Reyes, kinsa gitawag sab og The Magician, nag-edad og 63.
Human sa ilang sangka ni Tanio, si Reyes mosalmot sa 10-Ball Open Billiard Tournament karong Pebrero 19-23 sa Big Boom sa Sugbu sa South Road Properties (SRP).