Nanumbag kay napiksag aligato

(Napatik sa Pebrero 7, 2018)

Unom ka mga ulitawo ang nagpatala sa Tugbok Police Station human giingong nasumbagan tumong sa tiyan sa usa ka iladong abogado sa Davao City. Ang insidente nahitabo sa usa ka pribadong tunghaan sa Tugbok District diin ang mga nagreklamo mao sila Christoper Rey Balais Marante, 24, nagpuyo sa Bayanihan, Toril ug sila Edwin Macian Jr., Neil Camochu, Louie Paran, Darius Rubio ug Leo Alimasag. Subay sa blotter sa Tugbok Police Station, nag-perform ang mga nahisgutan og fire dancing aron mahimong sadya ang programa apan aksidenteng napiskan og aligato ang abogado ug nasuko kini. Sa kasuko sa abogado giingong nasumbagan niini si Marante tumong sa tiyan ug likod ug giingong gipang-apil og sumbag ang lima ka kaubanan sa team ni Marante. “Gipakuha nato og medical certificate ang mga reklamante aron mao to atong basehan sa ilang reklamo,” sulti ni P/CInsp. Randy Sambalud, hepe sa Tugbok Police Station.