4 patay, aksidente sa motorsiklo

Upat patay sa managlahing aksidente sa kadalanan sa lalawigan sa Sugbo kagahapon sa buntag nga pulos nagmotor.

Dead-on- arrival ang angkas sa usa ka motorsiklo dihang nadala kini sa Toledo City Hospital pasado alas 12 sa udto kagahapon.

Ang biktima naila nga si Ken Takatani, 21, sakay siya sa iyang bayaw nga si Wiljun Labora, 18, dihang naaksidente sa kurbadahong dalan sa Media Once, dakbayan sa Toledo.

Matod ni PO1 Emer Guillen sa Toledo City Traffic, ang duha natumba ug nabagnos ang motorsiklo sa dalan diin dihadiha kini naugbok ug nalagpot sa pikas nga lane ug naigo ang ulo sa luyo nga ba- hin sa ligid sa usa ka bus.

Gitanggong ang bus driver nga si Ambico Manayon, 47.

Samtang usa ka oras sa wala pa ang aksidente dihang patay usab sila si Christopher Rodriguez, 32, ug si Jesus Magallanes sa Barangay Binlod, Argao.

Si Rodriguez mao ang nagmaneho sa motorsiklo nga anaa sa pikas nga lane samtang nabangga usab kini sa usa ka motor nga gimaneho ni Magallanes.

Nasuta nga aduna’y sakay si Magallanes nga 72-anyos dihang nagbangga ang duha sa highway.

Samtang alas 4 kaadlawon kagahapon dihang patay usab si Ricky Lou Rentoma, 22, dihang nibangga kini sa naka-park nga truck sa dalan sa Valladolid.

Nalagpot ang biktima dihang nibangga kini hinungdang nakaangkon og nagkadaiyang samad sa lawas ug namatay.