LTFRB 7 mopagawas og bag-ong pletihan sa PUJs sa Talisay, Tabunok

Mopagawas ang Land Transportation Franchising and Regulatory Board (LTFRB) 7 og bag-ong pletihan sa mga public utility jeepney (PUJ) nga gikan sa Talisay ug Tabunok nga i-reroute ug temporaryo nga paagion sa Cebu South Coastal Road samtang nagpadayon ang paghimo sa tunnel sa Natalio Bacalso Avenue eskina dan F. Llamas, siyudad sa Sugbo.

Si LTFRB 7 Director Ahmed Cuizon nibutyag nga i-recompute nila ang rota kon pila ang gitas-on sa kilometros nga biyahe sa mga PUJ sa Tabunok ug Talisay aron i-adjust ang pletihan.

Ang pagpaagi sa mga PUJ sa Tabunok ug Talisay sa CSCR usa sa gitan-aw sa kagamhanan sa siyudad sa Sugbo ug LTFRB 7 nga mapaluag ang kahuot sa dagan sa trapiko sa N. Bacalso Avenue labi na panahon sa peak hours.

Matod ni Cuizon, sa ilang tigom sa dakbayan sa Talisay sa miaging semana, nasabutan nga ang mga PUJ nga gikan sa Naga, San Fernando ug Minglanilla, dili na palahuson sa Natalio Bacalso ug ang mga pasahero anha na pakanaugon sa Toyota, tumoy sa CSCR, habig sa Talisay.

Kuhaon sila og mga bus nga mobiyahe gikan sa maong dapit paingon sa Compania Maritima diin P15 ang pleti.

Si Cuizon nagkanayon nga moisyu sila og special permit alang sa mga bus kay molungtad pa kini og usa ka tuig.

Siya nipasabot makabentaha niini ang mga pasahero kay momubo na ang oras sa ilang biyahe gikan sa duha ka oras kon sa N. Bacalso moagi.

Samtang, ang mga multicab nga gikan sa Naga, San Fernando, ug Minglanilla paadtuon gihapon sa N. Bacalso apan kutob ra sa dan Macopa sa Mambaling diin makasakay sila og bus sa kagamhanan sa siyudad sa Sugbo nga libre ang pleti.

Ang mga PUJ sa Tabunok ug Talisay maoy pasudlon sa SRP diin moliko sila ilawom sa viaduct unya mopatighug paingon sa kilid sa SM Seaside padung gihapon sa Natalio Bacalso balik sa ilang naandan nga agianan kay dunay daghang mga estudyante sa Cebu Institute of Technology-University nga gikan sa Talisay, dugang ni Cuizon.

Mahitabo kini kon ang konseho sa siyudad sa Sugbo modeklarar na og state of emergency sa south district gumikan sa grabeng kahuot sa dagan sa trapiko tungod sa gitrabaho nga tunnel.

Si Cuizon nidugang ila una kining obserbahan sa pamasin nga mapaluag ang trapiko sa N. Bacalso Avenue sa pag-reroute sa mga PUJ sa Talisay ug Tabunok.

Ang mga motorista gitambagan sa pagbaton og pasensiya sa pagkakaron.

Sa pletihan, mag-recompute ta kay naay motaas nga rota, naa puy momubo nga rota,”

- LTFRB 7 Director Ahmed Cuizon