16 drug personality nasikop sa Consolacion, Carcar, Danao
Moabot sa 16 ka mga drug personality ang nasikop sa kapulisan sa managlahing mga operasyon sa lungsod sa Consolacion, mga dakbayan sa Carcar ug Danao.
Sa dakbayan sa Danao, walo ka mga pusher ug lima ka user ang nasikop sa managlahing operasyon sugod niadtong Biyernes sa gabii hangtod Sabado sa kaadlawon.
Nasakmit usab ang 13.1 ka gramos sa shabu diin nagkantidad kini og P155,170.
Naila ang mga pusher nga sila si John Elfred Tan, Jeryl Bravo Laurito, Abner Durano Batoon, Marjorie Ramirez Lao, Charlie Rosal Tacumba, Christine Joy Roca Julito, Omar Enriquez Gica ug laing minor.
Samtang adunay usa nga nakaikyas.
Samtang ang mga tigamitan naila nga sila Niño Rey Giango Ralota, Andy Meca Perales, Oswaldo Ceballos de Dios Jr., Marlon Batoon Olaguir ug Ritchel Real Tito.
Nasikop kini sa operasyon sa mga barangay sa Maslog, Looc ug Poblacion.
Samtang alas 5 sa hapon niadtong Sabado dihang nasikop usab si Mark Michael Demecillo Beltran, 25, sa Barangay Poblacion Oriental, Consolacion, diin nakuhaan kini og unom ka pakite sa shabu nga nagkantidad og P1,888.
Duha ka oras ang nakalabay dihang nadakpan usab si Antonio Tejad Jr., 21, ug iyang live-in partner nga si Roxam Lambohon Barcelo, 24, sa Barangay Poblacion 1, Carcar City. diin nakuhaan kini og 0.18 gramos sa shabu nga nagkantidad og P2,124.
Gikatakda nga pasakahan og kaso ning mga suspek karong adlawa sa tagsa-tagsa ka mga piskaliya diin didto nila gihimo ang ilang gilapas sa balaod kabahin sa Comprehensive Dangerous Drugs Act.