Color coding scheme sa traysikol sa Mingla

Gusto ni Minglanilla Mayor Elanito Peña nga mopatuman og color coding scheme sa mga traysikol nga magbiyahian sa ilang lungsod.

Usa kini sa nakita nga mga solution sa mayor aron maminosan ang kahuot sa dagan sa trapiko sa ilang lugar gumikan sa kadaghan sa mga traysikol nga anha magbiyahian sa national highway.

Si Konsehal Proserfina Fajutrao niingon nga nalatid sa mga provision sa prangkisa sa mga motorsiklo ang pagdili nila sa pagpabiyahe sa nasudnong highway sanglit anha lang sila kutob sa sud sa mga barangay.

Ang mayor namahayag nga pinaagi color coding scheme mahibaw-an kon asa mobiyahe ang mga traysikol nga dunay mga prangkisa.

Sa sobra 500 ka mga traysikol nga magbiyahian sa Minglanilla, si Peña nibana-bana nga 200 niini ang way mga prangkisa kon maisip nga mga colorum.

Sumala sa mayor nabuhat na nila sa una ang color coding scheme sa mga traysikol apan nahunong ug karon plano nilang ipatuman og balik.

Ang paagi, butangan og stickers ang lawas sa traysikol, ug pinaagi niini masubay kon asa magbiyahian ang traysikol.

Atol sa public hearing kalabot sa pagpatuman sa towing ug clamping sa Minglanilla niadtong Huwebes, usa ka drayber og traysikol nipadayag og kabalaka nga madakpan kay wa pay prangkisa ang iyang gimaneho.

Si Peña nipasabot ang moratorium sa pag-isyu og prangkisa alang sa traysikol gipatuman niadto pang panahon nga siya usa pa ka konsehal ug si anhing Mayor Eddie Selma pa ang nagdumala sa lungsod.

“Sa una pa man na katong kang kanhi Mayor Eddie Selma gihunong kay grabe na kaayo na ang traysikol diri. Mokuan gani ka way limit sa franchise, mapuno mi diri mapareha mi sa Carcar,” pagpasabot ni Peña dihang nahinabi sa mga tigbalita.

Siya nabalaka nga kon magsige og isyu og bag-ong mga prangkisa mosamot og kadaghan ang mga traysikol sa ilang lungsod.

“Kuyaw ni, modaghan ni, mosamot ni, asa ni mangagi kaning mga traysikola maski asa nga corner laposlapos unya magkadaghan na, mosamot nana og katrapik diri, mao ga-moratorium mi,” dugang sa mayor.

Moabot sa P695 ang bayran alang sa pagpa-renew og prangkisa diin karong tuiga 30 pa ang nagpa-renew.

Si Francis Sanguenza, officer-in-charge for operations sa Minglanilla Traffic Command (Mitcom), nisugyot nga pausbawan ang P500 nga kasamtangang multa batok niadtong makalapas sa mga lagda sa trapiko, aron magpanagana na og pabadlong ang mga motorista sa lungsod.

Matag adlaw lima ngadto sa pito ka mga motorsiklo ang ilang madakpan ug maisyuhan og citation tickets nga kasagaran nakalapas sa reckless driving, driving without license, ug obstruction of traffic flow, dugang ni Sanguenza.