Ospital sa Toledo

Makaluluoy karon ang mga residenteng kabus sa dakbayan sa Toledo human wala nay kadangpan sa ilang panginahanglan sa serbisyong medikal dihang kalit nga gipahunong ang operasyon sa Toledo City Hospital niadtong Biyernes ni acting Mayor Antonio Yapha, human wala nay pundong salapi nga ikasuweldo sa mga kawani ug galastohan sa pagdumala sa ospital nga gipanag-iya sa lokal nga kagamhanan.

Si Yapha nibasol sa konseho nga walay dinaliang aksiyon sa iyang giduso nga P1.2 bilyones ng giduso nga budget sa konseho alang sa 2018 niadtong Oktubre sa miaging tuig, diin P2 milyones niini alang sa suweldo sa job order ( JO) employees.

Apan si acting Vice Mayor Joie Perales nipasabot nga ubos pa sa evaluation ug review ang budget nga naa karon sa committee on appropriations sa konseho nga gipangulohan ni Merly Abad. Ang dakong kuwestiyon, unang quarter na sa tuig 2018 naa pa sa evaluation ug review ang budget? Tataw nga makapasmo na.

Sa pagtubag sa mga opisyal sa Toledo bahin sa isyu, makatimaho kita nga dunay pulitika luyo sa pagkabulilyaso sa operasyon sa ospital. Walay igong komunikasyon. Nag-iyahay lang.

Ug unang naapektohan, ang makaluluoy nga 100 ka mga kawani, diin 6 niini mga doktor, 52 ka mga nars, ug medical technologists, midwives ug ubang posisiyon sa ospital. Makaluluoy. Walay trabaho. Hinuon, mas maayo na lang usab kini kaysa nagpatay-patay og trabaho apan walay suweldo.

Wala gipanag-iya sa lalawigan sa Sugbo ang Toledo City Hospital busa, nganong wala nanginlabot ang Department of Health (DOH). Walay regular nga konsultasyon?

Dili kini tiaw nga panghitabo human naputol ang serbisyo sa publiko, labi na para sa mga kabus. Kinahanglang dunay manubag ug mapasakaan og kaso. Hinaut nga matakdo karong adlawa ang kutay sa maayong panghunahuna sa lider ug mga opisyal sa Toledo alang sa dinaliang pag-abli og balik sa ospital.