Canlas napagan sa underpass project?

Labing menos 12 ka mga kongresista sa Rehiyon 7 nipaluyo sa liderato ug katakos ni Department of Public Works and Highways (DPWH) 7 Director Ador Canlas nunot sa mga tinguha sa pagbabag sa pagpatuman sa pipila ka mga proyekto dinhi sa Sugbo.

Nipirma sila sa duha ka pahina nga suwat ngadto kang Kalihim Mark Villar sa DPWH. Lakip kanila sila si Cebu Reps. Gerald Anthony Gullas (1st district), Wilfredo Caminero (2nd district), Ramon Durano VI (5th district), Peter John Caldron (7th district), Raul del Mar (Cebu City, 1st district), Rodrigo Abellanosa (Cebu City, 2nd district), Aileen Radaza (Lapu-Lapu’s lone district) ug Jonas Cortes (sixth district).

Namirma sab sila si Reps. Rene Relampagos (1st district of Bohol), Erico Aristotle Aumentado (2nd district, Bohol), Jocelyn Sy-Limkaichiong (1st district, Negros Oriental) ug Arnolfo Teves Jr. (3rd district, Negros Oriental).

Karon pa ko makaalinggat nga 12 ka mga kongresista midupa sa usa ka regional director sa DPWH 7. Ang ngan man gud ni Canlas wa mabaniog nga nahilambigit og mga kontrobersiya. Unsa may iyang nahimo nga gipaluyohan man siya sa mga magbabalaod di lang sa Sugbo, kon di, bisan sa Bohol og Negros Oriental?

Sa ilang suwat ngadto kang Villar, ang pundok sa mga kongresista naghisgot sa mga pagsupak sa pagpatuman sa usa ka underpass, gitawag nga “depressed structure,” sa United Nations Avenue sa syudad sa Mandaue ug ubang mga proyekto sa ilang mga distrito. Gusto nilang tukion kini sa ilang pakigtagbo kang Villar karong Marso 14.

“It has come to our attention that a certain group in Cebu is currently exerting efforts to defer and/or even block in the guise of public welfare the implementation by the DPWH Regional Office VII of the construction of the UN Avenue Depressed Structure as well as other noteworthy infrastructure projects in our respective districts,” matod pa nila.

Matod pa sa mga kongresista, dunay pundok nga gustong pailisan si Canlas isip direktor sa DPWH 7.