From the time you say “I love you”
Gipaningot gyud ko tungod sa kabug-at ni Gemar. Apan di man sab maayo nga pasagdan ko lang siya. Hubog ra ba siya ug basig unsay mahitabo niya. Lisod ra ba ning siyudad, daghan ang mga binuang. Makonsensiya gyud ko kon dunay daotang mahitabo niya. Friend pa gyud nako siya ug usa ra ka lugar ang among gipuy-an sa Balamban.
“Paita nimo, uy, Gemar. Maghubog ka pero di ka man diay makamao moda’a sa imong kaugalingon!” Nagyawyaw ko samtang giagak ko siya sa pagpasulod sa iyang kuwarto.
Taksi ang among gisakyan aron dali ming mahiabot.
Wa pa ang mga kauban ni Gemar sa kuwato. Naglaag tingali kay Sabado man ron, way klase ugma. Duha ka double deck sulod sa kuwarto. Nagpasabot nga upat sila si Gemar nga nagpuyo. Mga estudyante sab tingali ang kauban ni Gemar sa kuwarto.
Gipahiluna ko si Gemar sa pagpahigda. Wa ko makahibawo kon ang gipahigdaan ko niya mao ba gyud ang Iyang katulganan. Ang importante nako nga mapahigda ko na siya ug makalingkawas na ko sa iyang kabug-at. Morag nakatulog na si Gemar kay wa na man maglihok. Nakapanglingo ko nga mibiya niya. Apan wa ko madayon sa paggawas sa kuwarto kay miagulo si Gemar. Nakalingi ko niya. Nagpiyong gihapon siya.
“Sofia, ikaw ang tinuod kong gimahal. I love you!”
Sa akong paminaw, mikurog ang tibuok kong lawas. Naglagot ko. Tiaw moy nagdamgo man tingali si Gemar ug ako ang iyang gidamgo. Nahigugma kuno siya nako.
“Uy, Gemar! Parehas tang laki, uy!”
Nagdali kong migawas sa kuwarto. Naglagot gyud ko sa akong nadungog. Ugma sukmatan ko si Gemar. Apan kalit nga nausab ang akong hunahuna. Wa sa maayong panghunahuna si Gemar nga nagsulti niadto kay hubog man siya. Ug morag nagdamgo lang sab siyaAh, di ko na lang hisgotan kang Gemar ang iyang gisulti. Angay ko sab kining kalimtan. Nakahibawo si Gemar nga girl ang akong gusto. Aw, tomboy na kon tomboy. Unsaon, mao man ni ang gihatag sa Diyos nako.
Pag-abot nako sa gisak-an kong boarding house, nakatan-aw kog dugay kang Sheena nga natulog sa iyang deck. Nakahunahuna ko sa pagtug-an niya nga gihimo lang siyang panakip-butas ni Gemar.
(SUMPAYAN)