JO employee sa Mandaue nakuhaan og drugas
Usa ka job order (JO) employee sa Mandaue City Hall usa sa 15 ka mga nadakpan sa kapulisan snga nalambigit sa ilegal nga drugas atol sa mga buy-bust operation miaging Sabado ug Dominggo.
Ang suspek giila nga si Gleen Soon, 37, taga Sitio Waling-Waling, Barangay Opao, Mandaue.
Si Soon nagsilbi nga JO isip garbage collector ubos sa Department of General Services sa city hall.
Matod ni PCInsp. Aldrin Villacampa, hepe sa Station 1 sa MCPO nga niadtong Sabado sa gabii, ang iyang buhatan nihimo og checkpoint sa may Zuelig St., Barangay Centro mga alas 8:40 sa gabii.
Ilang naparahan si Soon ug sa ilang pakisusi nakitaan kini nila og medium-sized nga pakete sa gituohang shabu.
Nasayran nga mokabat ngadto sa P59,000 ang dangerous drug value (DDV) sa nakuha gikan ni Soon.
Sukad niadtong Biyernes hangtod kagahapon, moabot ngadto sa 15 ka mga personalidad ang nasikop sa Mandaue City Police Office (MCPO).
Napulo ka mga gagmayng pakete lakip na ang medium-sized gikan ni Soon ang nakuha sa kapulisan.
Usa sab ka Johnrey Caparida, 19 anyos, taga Casili, lungsod sa Consolacion ang nakuhaan og .38 revolver nga may 6 ka mga bala.
Ang mga suspek kasamtangang gibalhog sa nagkadaiyang bilangguan gikatakdang pasakaan og kaso labot sa paghupot ug pagbaligya og iliel nga drugas.