Sunog sa Lapu-Lapu
Sulod lang sa pipila ka adlaw, duha ka mga barangay sa dakbayan sa Lapu-Lapu ang naigo sa dakong sunog. Liboan ka mga pamilya ang naapektohan ug gastosan ka mga balay ang naugdaw sa mga gipangpuy-an sa mga kabus natong kaigsuonan samtang nag-obserbar kita sa National Fire Prevention Month.
Sa Barangay Pajo, duha ka managsuon ang namatay niadtong Biyernes sa gabii. Kagahapon sa hapon, dakong sunog na usab ang niulbo sa Barangay Basak. Atol ning pagsuwat, wala pa matino kon dunay kinahubi ang nakalas apan gibanabana nga kapin na sa 300 ka mga balay ang naugdaw.
Ang kainit sa adlaw ning panahon sa summer usa sa dakong komplikasyon sa pag-ulbo dayon sa sunog tungod sa kauga sa palibot busa giobserbar nato karong panahona ang Fire Prevention Month.
Dunay mataligam-an gihapon sama sa nahitabo.
Sa mga biktima sa sunog, dili tiaw ang ilang nasinati karon nga problema. Kinsay dili maguol sa naugdaw nga kabtangan nga napundar sulod sa pipila ka tuig nga paningkamot? Mas labi na kadtong pamilya nga dunay nakalas nga kinabuhi.
Mao kini ang mapait nga kamatuoran. Nahitabo na. Atong dasigon ang mga biktima nga magbaton sa kalig-on sa baroganan ug mobangon. Hinuon, kitang Pinoy ug labi na ang Sugbuanon anad sa pag-antos ug daling mobarog gikan sa mga katalagman. Nasuwayan na kini sa makadaghang higayon sa atong kasaysayan.
Nasayod kita nga nagkapuliki ang lokal nga kagamhanan sa Lapu-Lapu lkaron sa pag-atiman sa mga biktma. Busa nanawagan kita sa ubang LGUs ug kitang mabuot nga lungsoranon sa pagtabang sa Lapu-Lapu. Ang pagtinabangay, gawas nga makapasadig sa mga biktima, dalaygong mithi nga atong ipatuman sa malambuong komunidad nga Sugbuanon.
Paglikay gyud sa sunog. Bangon gikan sa katalagman.