Parian duna nay bag-ong mga pulis; 43 ang gipuli

Ang 43 ka mga personnel gikan sa Cebu City Mobile Force Company nagsugod na sa pag-report kagahapon sa buntag sa Parian Police Station.

Si Senior Inspector Porferio Gabuya, officer-in-charge, nipahinumdom sa iyang mga ginsakpan nga magmatinud-anon ug di mangilkil nga makaangin sa ilang career.

Si Police Regional Office-Central Visayas Director Robert Quenery nimando sa pagrelibo sa 39 ka mga pulis sa Parian, lakip na sa police station chief, human masikop si Police Officer 3 Ritchie Saquilabon kinsa giingon nga nangayog suburno gikan sa usa ka drug suspect.

Si Senior Police Officer 2 Protacio Meredores, kinsa sakop na sa Cebu City Mobile Force Company sa nakalabay nga lima ka mga tuig, nisaad nga di moapil sa ilegal nga mga kalihukan.

Si Parian Barangay Captain Jeremias Nuñez kinsa niingon nga makigtagbo sa 20 ka mga tanod, human ang usa kanila giingon nga kakunsabo ni Saquilabon.

Siya nagduda nga nalambigit ang usa ka tanod.

Nakigtambayayong na siya sa Counter-Intelligence Task Force (CITF) ug nihatag sa hulagway sa 20 ka mga tanod.

Ang biktima ni Saquilabon niila sa tanod, apan di kaayo segurado.

Matod ni Nuñez nga iyang taktakon ang tanod kon mamatud-ang sad-an.

Ang tanod sa Parian nagdawatan og P4,000 gikan sa Cebu City Government ug P1,000 nga counterpart gikan sa Parian Barangay Council.