Carcar gibahaan

Lapas tuhod nga baha ang nasinati sa mga residente sa Brgy. Poblacion 3, siyudad sa Carcar, human sa kalit nga pagbundak sa uwan kagahapon sa hapon.

Sigun sa City Disaster Risk Reduction and Management Office nga natabunan og daghang hugaw ang spillway sa Sitio Lumboyan, Poblacion 3, hinungdan nga way kaagian og tubig ug niawas na hinuon kini paingon ngadto sa kadalanan.

Matod sa labaw sa Carcar CDRRMO nga si Kim Lauron, nga gawas sa Sitio Lumboyan apektado sab ang Sitio Dapdap sa mao gihapon nga barangay.

Dugang niya nga ang Barangay Poblacion 1 ilabi na ang gawas nga bahin sa merkado publiko sa Carcar, nga baha-on kon dunay uwan, lakip sa naapektohan ug nabahaan mugna sa nasinating thunderstorm sa dapit.

Gitug-an ni Lauron nga mga 12:45 sa udto nagsugod ang pag-uwan sa ilang siyudad ug nihunong lang kini kadiyot. Pagka-alas 2 sa hapon, nausban na usab kini.

Kon wa pa nihunong ang pag-uwan, gitumbok niya nga hayan mas daghang dapit pa ang maapektohan niini.

Nagpasalamat hinuon siya nga wa ray naangol ug wa say gipabakwit nunot sa paguwan ug pagbaha.

Duna hinuoy 5 ka mga pinuy-anan nga maoy grabeng naapektohan, human gisud sa tubig-baha ang ilang mga panimalay.

Human ang insidente, nagpadala dayon og ekipo ang barangay ug siyudad aron paglimpyo sa spillway.

Nagtapok ang tubig unya daghan ang gapnod, natabunan among spillway sa Lumboyan. Pagtabon ma’am, wa na siya ni-flow sa exact (way), mao to nibaha gyud diri sa unahan.” - CDRRMO Kim Lauron