Ecopilgrimage park gisubhan sa San Fernando

Tukma alang sa semana santa kining hingpit na nga pag-abli sa SEDC - St. Augustine Ecopilgrimage Park sa Sitio Dubdub, Barangay Magsico, lungsod sa San Fernando.

Tungod kay gawas sa plano nga butangan kini og simbahan sa tumoy, adunay stations of the cross nga pwedeng mabisita sa publiko sa umaabot nga Biyernes Santo.

Kagahapon sa buntag dihang giinagurahan na kini ug giblessingan diin mismo si Cebu Archbishop Jose Palma ang nangulo.

Ang park ang labing una nga ecopilgrimage park sa Archdiocese of Cebu diin partner niini ang Solid Earth Development Corp. (SEDC) nga maoy nidonar sa pito ka ektarya nga luna nga kaniadto mining area apan karon ilaha nang gi-restore.

Nagsugod ang partnership dihang gimugna ang IEC Committee on Environmental Concerns diin tumong niini mao ang pag-amping sa kalikupan.

Pebrero 16 sa nakalabay nga tuig dihang nisud og kasabutan ang San Agustin de Hippo Parish sa Magsico, San Fernando aron mahimong posible kini.

Gikan ra unta sa usa gusto sa archdiocese nga pocket forest karon nahimo nang malambuon ang plano sa simbahan ug nahimo na kini ecopilgrimage nga plano usab nga himuong ecotourism ug educational site.

Gawas sa stations of the cross sa dapit, tukoran pa kini og amphitheater, simbahan ug shop diin makapalit og mga lokal nga produkto nag hinimo ra usab sa mga residente sa dapit.

Matod ni Hiroyuki Sakakibara, chief technical adviser ug director sa SEDC nga P1.5 milyones ang pasiunang pundo nila sa proyekto.

Apan niabot na kinis a dulan P3 milyones diin anaa palang sila sa unang phase sa proyekto.