SUROYON TA ANG SANTA FE
Nagsingabot na ang summer!
Nagpangamay na ang puti nga mga bas, limpyo nga dagat ug ubang mga dapit nga sarang imong malingawan.
Kining tanan imong matagamtaman sa lungsod sa Santa Fe, sakop sa isla sa Bantayan.
Di makawang ang imong bakasyon kon anaa ka sa Santa Fe kay adunay daghang
beach resorts nga kaestahan. Ang sky diving maoy usa sa mga “extreme activities” nga ikadalit niadtong gusto mosuway niini.
Anaa usab ang matahom nga Virgin Island, ang Balidbid Lagoon, ang Laaw sa Kinatarkan Island diin ang daghang lato ug pwede nga anihon.
Gidayo usab ug gibalikbalikan ang naila na nga Ogtong Cave, ang Paradise Beach, ang Cliff Diving Area ug ang German Ruins diin nagsikbit ra ang nahimutangan niini ug sayo alang sa mga turista sa pagbisita.
Isip gateway sa duha ka mga lungsod sa isla, di malalis nga kadaghanan sa mga “tourist
attraction” anaa sa Santa Fe. Gani ang mga dapit nga gihimoan sa sine ug “documentary” sa ma-nasyonal o international man nahitabo sa lungsod diin gihimo kini sa MagTV na sa ABS-CBN, Byahe ni Drew, Camp Sawi Movie, Unang Hirit, ug uban pa.
Ang sine nga “I Found My Heart in Santa Fe” gipasalida niadtong Septiyembre 10, 2017 diin gipakita ang labing nindot nga mga talan-awon sa lungsod. Ang pelikula nakadawat og pasidungog gikan sa Cine Turismo.
Ang Cine Turismo usa ka kampanya sa Tourism Promotions Board nga nag-ila sa mga pelikula nga nagpakita o nagsaysay sa mga maayong talan-awon, buhat ug kultura kabahin sa Pilipinas.
Niini, ang Santa Fe napausbaw ug labaw sa tanan misamot kini sa kasikat.
Di lang kini kay sa ubang natad, ang lugar nahimo usab kini nga host sa mga dagko nga kalihokan sama sa water sports niadtong 2014 ug ang kite boarding competition sud na sa duha ka tuig.
Niadtong Marso 10 ug 11, ang Beach Volleyball Republic (BVR) On Tour gihimo sa Santa Fe diin gipasundayag ang kalihokan sa national television.
Kay nagsingabot naman ang summer nag-andam ang lungsod nga modoble ang ilang mga bisita.
Ning bag-ohay lang, ang television program sa kagamhanan sa lalawigan sa Sugbo nga “Mag-Uban Kita” mipasundayag sa Santa Fe ug gipakita nga bisan sa kadaot resulta sa Bagyong Yolanda niadtong 2013 apan anaa gihapon ang tinud-anay nga kahulogan sa turismo nga anaa sa kasingkasing ug huna-huna. Kini maoy hinungdan nga usa kini sa modelo nga lungsod uban sa iyang malambuon nga turismo.
“If you wish to visit Philippines, choose Cebu and find your heart in Santa Fe,” padayag ni Mayor Jose Esgana. Tara na! Suroyon ta ang Santa Fe karon na! /