Pulis na sab?
Laing tinugyanan sa balaod ang nasentro na usab karon sa kontrobersiya nga may kalabot sa gidiling drugas. Si PO3 Richie Saquilabon, sakop sa anti-drug operative sa Parian Police Station, nasikop atol sa entrapment nga gipahigayon sa Counter-Intelligence Task Force (CITF) Visayas human kini giingon nga nangilkil sa inahan sa ilang dinakpan nga drug suspect.
Moabot ngadto sa P20,000 ang gipangayo ni Saquilabon kang Gloria Labus, 64 amyos nga inahan sa drug suspect nga ilang dinakpan nga si Richie Labus.
Pinasubay sa proseso, hayag ang posibilidad nga mataktak sa serbisyo si Saquilabon kinsa giingon nga adunay kauban nga laing duha ka pulis ug usa ka barangay tanod nga nakaikyas atol sa operation.
Sa pagkasikop ni Saquilabon, naamong ang iyang mga kauban sa Parian Police lakip ang ilang hepe kay silang tanan gipangrelibohan.
Niadtong Marso 6, si PO1 Jayrome Solano akto usab nga nasakpan nga nagsuyop og shabu kauban sa iyang uyab nga usa ka drug personality.
Giingon nga si Solano, sakop sa Police Carbon, usa usab sa tig supply og gidiling drugas sa pipila ka dapit dinhi sa dakbayan sa Sugbo.
Niadtong Marso 16. usa ka pulis nga gidudahang nalambigit sa gidiling drugas ang gipusil-patay sa Barangay Lipata, lungsod sa Minglanilla.
Si PO2 Romeo Bolano, sakay sa iyang pula nga awto kauban ni PO3 Nikki Carlo Plarisan sa Minglanilla Police ang gibanhigan patay ala 1:45 sa hapon.
Kining atong gisaysay sa unahan naghatag lang og timailhan nga wa makatarog sa mga badlungong pulis ang pagpataas ni Presidente Duterte sa ilang sweldo.
Unsa na man sab diay tong giingon ni PNP Chief Ronald dela Rosa nga mga pinili na lang nga mga pulis ang iyang giapil sa kampanya batok sa gidiling drugas? Wa epek.