Thinking about you

Nasuod ko na si Jino. Siya ra ang akong gitug-anan sa akong plano nga mobalhin kog university. Dihang closing na sa eskuwela, naglikay na ko kang Rannel kay parehas man ming duha nga mipauli sa lungsod nga among gipuy-an. Nakamatikod tingali siya nga di na ko gusto nga makigsuod niya, siya sab naglikay na nako. sakit man tuod apan gidawat ko na lang nga si Sarah ang iyang gimahal.

Usa ka adlaw, nakita ko na lang nga nagkuyog sa papangaligo sa dagat sila si Rannel ug Sarah. Mianhi gyud diay si Sarah sa among lugar aron ikauban si Rannel? Igo na lang kong nagpatulo sa akong mga luha. Unya, usa ka hapon nga gikan kong nanimba sa simbahan sa among lugar, maoy akong naabtan sa among sala si Jino.

Malipayon kaayo siya pagkakita nako. Ug ako sab, nalipay pagkakita niya. Milingkod dayon ko sa iyang atbang.

“Nia ka man lagi? Wa diay ka mopauli sa inyo sa Tagbilaran nga wa na may klase?”

“Didto ko gikan. Pero kadali ra. Gusto kong makita ang inyong lugar. Nindot man diay dinhi. Sa akong paniid, peaceful.”

“Malinawon dinhi, Jin. Wa kay angay kabalak-an.”

Miyangu-yango si Jino nga nagsigeg tan-aw nako. Nakapanglingu-lingo na lang ko kay nahunahuna nako nga mianhi gyud siya aron lang tingali makita ko niya.

“Asa ka man diay nagsaka ron, Jin?”

“Naa man diay boarding house dinhi, naa duol sa plasa. Diha ko magsaka ron. Maayo gani kay ang gikasakay ko sa Ceres sa pagpaingon dinhi taga dinhi sab sa inyong lugar. Siya ang nagtultol nako sa boarding house.”

“Ay, oo diay, no? Maayo nuon. Dugay ka pa dinhi?”

“Sa akong pagtuo, madugay ko. Taas pa man ang bakasyon. Di man sab ko mo-summer class? Ikaw, Cass, mo-summer class ka?”

“Di lang, Jin, uy. Tabangan ko sila si Mama ug Papa sa pag-atiman sa among uma sa bukirang bahin dinhi sa among lugar. Mangadto man gani mi ugma.”

“Aw, mao ba? Mokuyog ko ninyo, ha?”

Wa dayon ko makatubag. Mokaon ba kahag pinobre kini si Jino? Kaikog gyud, uy! Sa ako ra bang nahibaw-an gikan kang Rannel, dato sila si Jino sa Tagbilaran.

(SUMPAYAN)