Anino sa kagahapon

SAMUEL P. RUSIANA Bato, Samboan, Cebu

Dugay nga silingan sila si Fredo ug Janet sa barangay Dalahikan, maong nasinati na nila ang usag usa. Nagkasuod sila kay kanunay magkuyog padulong sa eskuylahan gikan pa sa pagka bata. Nayiskol na sila dihang nagkasinabot ang ilang mga pagbati. Nagtuo ang ilang isigka ginikanan nga sila ang magkadayon.

Apan milarga si Janet paingon sa Manila pagka human sa hayiskol aron adto didto manimpalad.

“Ayaw ko og kalimti,” ni Janet nga naghilak dihang gihatod ni Fredo sa pantalan.

“Maghuwat ko nimo,” ni Fredo nga gisakitan samtang migakos kang Janet.

Sukad milarga si Janet wala na kini mobalik. Naputol sab ang ilang komunikasyon.

Paglabay sa panahon gikaila ni Fredo si Chona nga taga Mindanao. Nadani siya sa kabuotan sa dalaga ug iya kining gipakaslan. Human sa ilang kasal nanglarga sila paingon sa Zamboanga aron adto mangita og panginabuhian.

Usa niana ka adlaw samtang naninda si Chona sulod sa merkado may mibuto nga bomga. Usa si Chona nga nabiktima; nawad-an siya sa iyang panan-aw. Nakahukom si Fredo nga mobalik sa barangay Dalahikan.

Miadto si Fredo sa dakbayan sa Sugbo aron mangita og trabaho. Nadawat siyang drayber ug gipa-report sa ilang manedyer.

“Ikaw ang manedyer?” matod ni Fredo nga wa damha nga magkita sila si Janet.

“Ako na ang nagpadagan sa among negusyo sukad motaliwan ang akong bana. Biyuda na ko, apan way

anak,” tug-an ni Janet.

Tungod kay suod sila ug may relasyon kaniadto gihimo si Fredo nga personal driver ni Janet.

Usa ka higayon nga gikan sa miting giingnan ni Janet si Fredo nga mohapit sila sa motel.

“Fred, dugay na kaayo nga gimingaw ko nimo. Lipaya ko sama sa atong gibuhat kaniadto,” ni Janet dihang didto na sila sa usa ka lawak sa motel. Nangalisbo sa kahumot si Janet nga gigakos ni Fredo. Ang kinawat-kawat nilang kalipay nasundan pa sa makadaghang higayon, hangtod nakonsensiya si Fredo sa ilang gibuhat kay misantop sa iyang hunahuna si Chona.

Usa ka adlaw nananghid si Fredo kang Janet nga mobakasyon una. “Mopahuway ko kay wala sa kondisyon akong lawas,” namakak si Fredo aron makalikay sa tentasyon.

“Ikaw god. Basta kanunay ko maghulat nimo,” ni Janet nga mipisil-pisil sa kamot ni Fredo.

SAMTANG nagbakasyon si Fredo naluoy siya nga nagsudong sa kahimtang sa iyang asawa. Bisan dili na makakita, motabang gihapon kini sa trabahuon sa panimalay.

Milabay ang usa ka bulan gitawgan ni Janet si Fredo sa selpon, “Imbitado ka sa akong birthday. Maghuwat ko nimo sa balay.”

Dili unta motambong si Fredo sa birthday party ni Janet, apan wa na siya makabalibad kay gipakuha siyag sakyanan. Human sa ‘party’ mihangyo si Janet nga magpabilin si Fredo.

“Kalimtan na nato ang kagahapon, Janet. May pamilya na ko. Pasagdi ko nga magpuyo nga malinawon,” hangyo ni Fredo nga mihikap sa aping ni Janet.

“Nakasabot ko sa imong sitwasyon, Fred, apan dili ko ikaw mahikalimtan. Ikaw ang bugtong lalake nga akong gimahal!” ni Janet nga migakos kang Fredo.

“Kini na ang katapusan natong panagkita,” ni Fredo. “Isulay paglingi sa uban ang imong panan-aw. May makit-an ka pang labaw pa kay kanako.”

“Pero way makapareho nimo!” ni Janet. “Tutoki ko ug ingna nga wala na kay gusto nako.”

“Sorry. Ang tinuod wa na koy ‘feelings’ nimo,” ni Fredo.

“Pwede ba lipayon ko nimo sa katapusang higayon?” hangyo ni Janet, nagpakiluoy.

Human sa kalipay nga ilang gisaluhan milakaw si Fredo nga way lingi-lingi. Naglugmaw sa iyang mga mata ang iyang mga luha. Nagsagol ang iyang gibati. Nasakitan siya kay nahigugma pa siyang kang Janet. Apan nakonsensiya pod siya tali niya ug sa iyang asawa nga nagpaabot kaniya. Naluoy kaayo siya kang Chona. Mao nga gibug-os niya ang iyang hukom nga dili na magpalandong sa anino sa kagahapon nilang Janet.

(KATAPUSAN)