Tabal manugbalik sa Italy

Molarga pagbalik paingon sa Italy si Cebu marathon Olympian Mary Joy Tabal sa hinapos nga bahin ning buwana aron sugdan ang hugot niyang pagbansaybansay alang sa 2018 Asian Games sa Indonesia nga magsugod karong Agusto 18.

Ang lumad nga taga Barangay Guba, dakbayan sa Sugbo mogikan karong Marso 27 paingon sa Italy diin sulod sa lima ka mga buwan siyang mag-training sa Tuscany Training Camp ubos sa paggiya ni coach Giusseppe Giambrone.

“My visa for Italy has been released. So we’re good to go. Our target is to leave for Italy on March 27,” matod ni Tabal, gold medallist sa 29th Southeast Asian (SEA) Games, sa interbyu sa SunStar Cebu.

Si Tabal, kinsa maoy labing unang Pinay nga nakadagan sa Olympics, naglaom og grabe ka lisod nga training sa Italy.

“I will commit myself to focus on the task and training. I will really give my all on training for Asian Games,” dugang ni Tabal, kinsa gigiyahan sa dugay na niyang coach nga si John Philip Dueñas.

“For the Tuscany Camp, I will follow the training program of Giusseppe Giambrone but all the results and progress will be forward to JPD (Dueñas) and coach Akio Usami (from Japan).”

Giklaro ni Tabal nga si Dueñas lang gihapon ang mobuhi sa pinal nga desisyon kabahin sa iyang training.

Ang 28 anyos nga five-time reigning Milo Marathon champion nagtinguha nga makuha niya ang labing maayong kondisyon sa iyang pagdagan sa Asian Games sa labing unang higayon.