SANGALANG VS. KRAKEN
Munas ginhawang nasugakod si bigman Ian Sangalang sa Magnolia Ang Pambansang Manok Hotshots batok sa iyang mga kaparang sa NLEX Road Warriors nga sila si Mike Miranda ug Raul Soyud sa bag-uhay lang nahuman nga semi-finals series sa Philippine Basketball Association (PBA) 2018 Philippine Cup.
Apan sa sunod nga tahas sa Hotshots, seguradong mas lisod nga pagsuway ang sagubangon ni Sangalang, ang higanteng sentro sa San Miguel Beermen nga si JuneMar Fajardo.
Niadtong Martes sa gabii, nadispatsar sa Hotshots ang Road Warriors pinaagi sa 98-89 nga kadaugan sa Game 6 nga maoy nagtiklop sa ilang best-of-seven semi-finals series, 4-2.
Ang Hotshots aduna ra’y duha ka mga adlaw aron makapangandam sa sunod nilang misyon batok sa Beermen sa championship best-ofseven series nga sugdan ugma sa Araneta Coliseum.
Ning sangkaa, si Sangalang ang magpas-an sa labing bugat nga obligasyon sa tanang ginsakupan sa Hotshots.
“Kilala naman nating lahat si June Mar, sobrang consistent niya at tsaka malaki siya talaga,” matod ni Sangalang kabahin sa gitawag og ‘The Kraken’ sa interbyu sa Spin.ph.
“At sigurado ako yung kukuha sa kanya. “Pero siyempre I will do my best kasi iba rin naman yung laro sa finals.”
Sa dili pa siya makigbinanggaay sa lumad nga taga lungsod sa Pinamungajan, Cebu, si Sangalang mikawat og oras aron hangupon ang katam-is nga makataak siya pagbalik sa finals.
Usa pa ka rookie si Sangalang dihang katapusang nakataak sa finals ang Purefoods franchise niadtong 2014 diin ilang nakuha ang talagsaong Grandslam title.
“Sobrang sarap kasi ang tagal naming hindi nakabalik sa finals. Sobrang tagal naming mangarap na makalaro ulit sa finals,” dugang sa 26 anyos ug 6’7” nga si Sangalang.
“Now eto na, andito na kami ngayon. So kung ano yung kaya naming gawin, iga-grab namin yun.”
Gawas kang Sangalang, ang Hotshots mosandig sab sa abilidad nila ni Mark Barroca, Jio Jalalon, Rome Dela Rosa, Peter June Simon ug Aldrech Ramos sa pagpakigparang sa dili mabangbang nga puwersa sa Beermen.