TRES NI MORRIS MITIKLO SA OKC
Nagpabuto og three-point
bomb si Marcus Morris sa nahabiling 1.2 segundos aron agakon ang hosts Boston Celtics sa 100-99 nga kadaugan batok sa Oklahoma City Thunder kagahapon sa National Basketball Association (NBA).
Namugna sa Celtics ang makapakugang nga kadaugan bisan wala ang ilang lider nga si Kyrie Ir ving, kinsa nagpaalim sa angol sa iyang tuhod.
“Probably my biggest (shot),” matod ni Morris. “I’ve hit a couple to tie it up. But was my first actual to win it.”
Ang Celtics, nga nakaseguro nang daan og luna sa playoffs dala ang 48-23 nga rekord, gipangulohan ni Jayson Tatum pinaagi sa iyang 23 puntos ug 11
rebounds, nitampo og 21 puntos si Morris samtang niamot og 17 puntos si Greg Monroe.
Ang Thunder, nga nahagsa sa nahagsa sa 43-30 nga rekord human naputol ang ilang unom ka sunodsunod nga kadaugan, gipangulohan ni Russell Westbrook pinaagi sa iyang 27 puntos, nihatag og 24 puntos si Paul George samtang nitunol og 14 puntos si Steven Adams.
Ang Thunder nasipyat sa nag-una nilang 15 ka three-point
attempts una sila nakapasulod og upat ka sunodsunod nga naghatag kanila og 93-89 nga labaw sa hinapos nga bahin.
Ninggukod ang Celtics hangtod nga nahatagan og kahigayunan si Morris sa pag-itsa sa iyang nakapadaog nga tres.
Sa laing mga duwa, ningdaog ang Toronto Raptors batok Orlando Magic, 93-86, Minnesota Timberwolves batok LA Clippers, 123-109, New Orleans Pelicans batok Dallas Mavericks, 115-105, Atlanta hawks batok Utah Jazz, 99-94, Detriot Pistons batok Phoenix Suns, 115-98, ug Houston Rockets batok Portland TrailBlazers, 115-111.