IGSUON NI PETER LIM GI-AMBUSH

WELLINGTON NAKALINGKAWAS, APAN GUARD NAMATAY

Gibanhigan sa dili mominos duha ka mga tawo si Wellington Lim, manghod sa ginganlan ni Presidente Rodrigo Duterte nga supplier sa illegal nga drugas sa mga big time drug lord sa Visayas region, nga si Peter Lim.

Mga alas 11:45 niadtong Biyernes sa gabii si Wellington Lim nasigpatan sa Infinity Bar sa may Archbishop Reyes Avenue, duol sa Cebu Business Park, siyudad sa Sugbo.

Sa dihang padung na mobiya si Lim sa Infinity sakay sa iyang Ford Expedition, kalit kini nga gibabagan sa puti nga van nga dunay sakay nga sobra sa duha ka wa mailhing mga lalake.

Nipagawas kini sa ilang tagas nga kalibre sa armas nga gihulagway sa mga saksi nga M16 armalite rifle ug dayong paarak sa sakyanan sa biktima.

Matod ni SPO3 Wetzel Berry, imbestigador sa Homicide Section sa Cebu City Police Office, nga wa makadulot ang bala sa M16 sanglit naka bulletproof ang sakyanan ni Lim.

Nakahigayon pa kini sa pag-ikyas ug nidiretso sa pagpark sa usa sa mga edipisyo sa IT Park diin siya nagpuyo.

Nag-inusara lang si Wellington sa iyang sakyanan sukwahi sa unang nanggawas nga report nga dunay armado nga mga kauban nga mibawos pa sa pagpamusil sa mga gunman.

NAPAGAN

Sa nakuha nga kasayuran sa Homicide Section, gigukod pa sa mga gunman si Lim.

Sa pagpamusil, namatay ang gwardya sa bar nga si Wilson Bucay, nga giingong naangin lang samtang nagpaatras sa sakyanan ni Lim atol sa pagpamanhig.

Naangol usab ang laing gwardya nga naa sa entrance sa bar nga si George Lambating, 52, taga Subangdaku, Mandaue City, sakop sa Golden Sun agency.

Lakip sa naigo ang duha ka German national nga nagdumili sa pagpahingan sa kahadlok nga maalarma ang ilang kabanay sa ilang nasud.

Ang duha naa sa usa ka pribadong tambalanan.

Nakakuha og 53 ka basiyo sa bala sa M16 rifle, upat ka buhing bala sa M16 ug duha sa kalibre 9mm ang kapulisan.

Ang mga sakop sa Investigation and Detective Management Branch nga gipangulohan ni Supt. Ryan Devaras misuway pagkuha sa habig ni Wellington sulod sa condominium apan napakyas kay wa mogawas.

Matod ni Devaras nga importante ang pamahayag ni Wellington sanglit siya ang gi target sa armadong mga lalake nga mibanhig kaniya.

Bisan og wa pa makahatag sa iyang pamahayag si Wellington, duha ka mga anggulo ang gisubay sa Homicide Section.

Kini may kalabotan sa personal nga motibo ug negosyo.

PULIS RA?

Si Peter, sa iyang bahin, niingon nga ang nag-ambush sa iyang igsuon naggamit og armalite ug sakyanan nga sagad giisyu ngadto sa Philippine National Police (PNP).

“This ambush is worse. This would be okay if the person is guilty of violating the law. But we are innocent. Why do they did it to us? Just to satisfy public clamor? Out life is at stake here. The public must help us against this glaring attempt of the life of my brother,” nagkanayon si Peter.

Nisulti kaniya si Wellington nga sa iyang paggawas sa Infinity, nakakita siyag mga 10 ka tawo nga nag-itom og uniform nga nangrakrak kaniya.

/ JUN MIGALLEN ■ NAMATAY: Patay nang nagligdas ang security guard nga si Wilson Bucay human mapagi sa pagpaarak sa labing minos duha ka mga gunman sa sakyanan ni Wellington Lim, kinsa iyang gigiyahan sa pagpaatras gawas sa Infinity bar. Si Lim nga nagsakay sa iyang...

/ FILE ■ MAGSUON: Ang magsuong Wellington (wala) ug Peter Lim.