Gwen hugot nang modagan pagka gobernador sa Cebu

Duna nay nahunahunaan si Kongresista Gwendolyn Garcia nga pares sa iyang pagdagan og balik pagka gobernador sa lalawigan sa Sugbo sa umaabot nga piniliay sa sunod tuig.

“Naa na pero dili sa ta mo sultian, tagsa tagsa sa para ba impact,” pagbutyag sa deputy speaker sa iyang mamahimo nga running mate sa 2019 election.

Wa siya motug-an kon kinsa ang tawo nga iyang gipasabot apan nihatag kini og clue.

“Kon female man, maseguro ninyo gwapa gyud akong pilion,” pamulong ni Garcia dihang nahinabi sa mga tigbalita niadtong Biyernes.

Si Garcia nisubli nga seryuso niya nga gikonsiderar nga subling magpapili pagka gobernador sa lalawigan tungod sa daghan niawhag niya kay giingong siya ang gikahadlokan ni incumbent Governor Hilario Davide III.

Ang kongresista sa ikatulong distrito nikatawa sa dihang siya gipangutana kon ang iyang gipasabot mao ba ang iyang suod nga higala, ang magpapatigayon ug philanthropist nga si Mariquita Salimbangon-Yeung, kinsa tupad niya og lingkod niadtong higayona.

Si Yeung, manghod ni Kongresista Benhur Salimbangon sa ikaupat nga distrito.

Naa na sa iyang katapusang termino si Salimbangon ug usa ang pangan niini nga gipatugbaw nga posible mamahimo nga running mate ni Garcia.

Matod sa deputy speaker, ang bag-ong kamandoan ni Ombudsman Conchita Carpio-Morales niadtong Pebrero nga nagpatangtang niya sa serbisyo gumikan sa kaso nga pag-abuno og yuta sa kontrobersyal nga Balili Property niadtong 2012, ang nakapahunahuna niya nga mosubli sa pagka gobernador.

Siya nipasangil nga nagpatabang si Davide sa Ombudsman aron mababagan ang iyang pagdagan og balik pagka gobernador.

“Tinuod gyud tingali nahadlok gyud ni si Davide nako kay muna muna naman lang og patabang…So, because of that murag mosugod nakog tuo sa kadaghanan nga giingon nga hadlok si Davide nako,” dugang ni Garcia.

Si Davide wa makuhai sa iyang habig sa Superbalita Cebu kay tua kini sa kaulohan sa pagkutlo ning balita.

Ang dismissal order ni Morales may kalambigitan sa pagpalit sa provincial government og filling materials nga gitambak sa dakong bahin sa Balili property nga naa sa ilawom sa dagat ug kabakhawan sa Barangay Tinaan, siyudad sa Naga.

Si Garcia nagtuo nga mabalik sa pagka numero uno ang Sugbo kon siya ang modaog sa pagka gobernador.

Pagbiya niya sa pwesto, numero uno ang Sugbo sa index sa National Competitive Council apan pagka 2014 nahimong number 3, nahimutang sa ika 35 pagka 2015 ug ika 45 sa 2016 nga pulos ubos sa administrasyon ni Davide.