2 ka security agency way kontra sa bidding

Duha ka mga security agency nga kasamtangang nagserbisyo sa Kapitolyo ug sa mga vital installation niini, wa’y kontra sa gihimo nga bidding alang sa laing duha ka tuig nga kontrata nga security services sa Provincial Government.

Ang Bids and Awards Committee kasamtangang nipaubos sa duha ka mga ahensiya sa post qualification process alang sa subling pag-kontrata kanila og laing duha ka tuig.

Gitug-an ni Provincial General Services Officer Jone Sepe nga sa gihimo nga bid opening alang sa security services niadtong Marso 14, ang Tactical Security Agency ug GDS Security Agency lang ang niduso sa ilang mga dokumento.

Ang duha ka mga ahensiya maoy kasamtangan nga naghatag og seguridad sa Capitol compound ug sa tanang vital installation sa Provincial Government.

Di mominos sa P25 milyones ang Approved Budget for the Contract (ABC) alang sa laing duha ka tuig nga security services contract.

Pasado ang duha ka ahensiya niini ug kasamtangan na silang gipaubos sa post qualification process alang sa hingpit na unya nga pag-award sa kontrata.

Matod ni Sepe, gipatas-an ang gahin alang sa security services tungod sa panginahanglan sa mas daghang gwardiya, ilabi na sa gidumala nila nga mga provincial hospital ug sa bag-o nila nga mga pasilidad.

Sa Abril 16 gipaabot nga mapupos ang kasamtangang kontrata sa Tactical ug GDS sa Kapitolyo, apan kon di pa maaward kanila ang bag-ong kontrata, hayan nga gihikay na usab ang usa ka buwan nga extention sa ilang serbisyo.

Nakontrobersiyal ang security services sa Kapitolyo niadtong 2014 human gipasugod na sa pagpatrabaho ang mga sakop sa Black Pearl Security Agency bisan kon wala pa naaward ang kontrata sa maong ahensiya.

Human sa maong kontrobersiya hangtud niining tungora, ang Tactical ug GDS Security Agency na maoy nahimong “main stay” sa paghatag og seguridad sa Kapitolyo ug sa mga propiyedad niini.

Matod ni Sepe, way nakitang problema sa serbisyo sa mao nga mga ahensiya.