GI-LIVE SA FACEBOOK ANG PAGKAON OG UNOD SA TAWO
Nihimo og pakisusi ang kapulisan sa Latvia sa usa ka
show nga nagpakita sa duha ka mga tawo nga gipakaon sa giingong unod nga gikan sa ilang kaugalingong mga lawas.
Ang ngilngig nga pasundayag kay gipakita nga live sa Facebook ni Latvian artist Arturs Berzins ngadto sa liboan ka viewers nga nakaani og daghang mga reklamo.
Sa footage, makita ang duha ka volunteers nga gipalingkod samtang ang usa ka tawo nga nagsul-ob og forensic suit kay nihiwa og unod sa luyong bahin sa ilang mga lawas gamit ang
scalpel nga gidudahang wala maggamit og local anesthetic.
Human makuha ang unod, gibutang kini ngadto sa frying pan ug giluto samtang nagtan-aw ang duha ka volunteers . Human maluto, gikuha sa nagsul-ob og forensic suit ang unod gikan sa pan ug gihungit ngadto sa duha ka mga tawo.
Ang awtoridad niimbestigar sa pasundayag niadtong Marso 6 sa usa ka museum sa Riga, ang capital sa Latvia.
Wa makompirmar kon tinuod ba nga unod ang gihiwa gikan sa ilang lawas o gidrama lang.
Nangita na og mga ebidensya ang kapulisan alang sa kaso nga posibleng ipasaka batok ni Berzins.
Matod sa report sa Mirror News, gusto ipakita sa ‘Eschatology’ show kon unsay mahitabo sa katawhan kon wala nay pagkaon ang kalibotan.
Ang show nagsugyot nga ang mga tawo moresulta sa cannibalism kon wala nay pagkaon. Ang mga aktor nga apil sa pasundayag mao sila si Karl Zvejnieks, Suura Nettle, PainProTest ug uban pa. /