Stamp pad o tadtaran ang RDC?

Nalingaw kog lalis diha sa Facebook kabahin sa kahimtang karon sa Regional Development Council (RDC) 7 human wa suportahi niini ang lima ka underpass projects nga gisuportahan ni Kong. Raul del Mar.

Matod pa sa usa nato ka higala, di na stamp pad ang RDC kay giingong wa na kini padiktar sa usa ka politiko, buot ipasabot si del Mar.

Mga independente ang private sector representatives nga maoy nagdala na sa liderato sa RDC nga ang mga negusyanteng Glenn Soco ug Kenneth Cobonpue.

Mga lodi kini sila sa pribadong sector sa Sugbo.

Si Glenn Soco, gawas nga media personality, eksperto kini sa coffee business ug kaniadtong nilansar siya alang sa pagka bise gobernador, nipaluyo ako kaniya.

Unang nakakita ko ni Kenneth Cobonpue mao kadtong duna siyay presentation atol sa usa ka event sa Cebu Chamber of Commerce and Industry (CCCI).

Apan basi sa usa ka dokumento nga akong nahipos, lakip ang lima ka underpass projects sa Central Visayas Fiscal Year 2019 Annual Investment Program Priority Programs/Activities/Projects (PAPs) alang sa first legislative district sa Syudad sa Sugbo.

Gipirmahan kini kapin sa duha ka bulan nga miagi nilang Japhet M. Salera, engineer sa Department of Public Works and Highways (DPWH); Marilyn A. Ojeda, Planning and Design Section chief sa DPWH; ug Jose R. Gauran Jr., OIC-district engineer.

Kay mga proyekto man kini sa first legislative district sa Syudad sa Sugbo, natural pinirmahan ug suportado kini ni Kong. Raul del Mar.

Kining maong dokumento lakip na unta sa agenda sa full RDC 7 meeting sa miaging semana.

Apan gikahibudngan kay nawala sa agenda ang maong dokumento mao nga wala na matuki.

Tungod niini, wa ma-endorse sa RDC ang maong mga underpass nga unta makatabang og sulbad sa kahuot sa trapiko.

Alang sa mga uyon sa maong panghitabo, di na kuno stamp pad sa mga politiko ang RDC.

Apan lahi ang akong pagbasa sa nahitabo.

Maingon nato nga gihimong tadtaran kun chopping block ang RDC sa mga proyekto nga giduso na unta sa DPWH.

Moingon ang mga tig-depensa sa maong lakang nga way bahid sa politika ang maong hitabo.

Apan klaro man nga ilang gihikawan ang first district og mga proyekto nga giduso ni Kong. Del Mar, nga kaalyado ni Mayor Tomas Osmeña.

With due respects kanila ni Glenn ug Kenneth, di malimod nga suod sila kang Presidential Assistant for Visayas Mike Dino nga nagsuportar sa oposisyon sa Syudad sa Sugbo. Sila si Dino ug Osmeña kaatbang. Klaro man.