Kasabot

Nagaagad ang kahulogan sa daghan sa atong mga pinulongang Bisaya sa punto sa paglitok kun “accent”. Ang “kasábot” lahi sa “kasabòt”. Ang una mao ang panagtagbo sa hunahuna sa duha ka tawo mahitungod sa usa ka butang o bulohaton. Ang ikaduha mahitungod sa pagkabot sa insaktong kahulogan sa usa ka butang. Kon nakasabòt na ang tagsatagsa ka mga sakop sa usa ka kulokabildo sa kahulogan sa giistoryahan, mahimo na silang managsábot. Mao nga importante kining paghisgothisgot, pagpangutana, ug pagkulokabildo usa mohimo ogdesisyon o lakang.

Karong adlawa gisaulog na usab nato ang Dominggo sa Lukay. Taastaas ang ebanghelyo sa Misa mao nga ang gigamit nato mao ang ebanghelyo nga maoy moduyog sa pagsulod sa mga manimbahay sa simbahan uban ang pari. Mahitungod kini sa pagsulod ni Jesus sa Jerusalem samtang nagwarawara ang mga tawo og mga lukay ug mingsinggit: “Osana! Daygon ang naga-anhi sa ngalan sa Ginoo! Daygon ang umaabot nga gingharian sa atong amahan nga si David! Osana sa kahitas-an!”

Usa kini mahitabo adunay gikasabot si Jesus nga mga sumusunod. Ang duha niini gipauna niya didto sa duha ka balangay nga duol sa Jerusalem, ang Betpage ug Betania. Aduna siyay mga suod nga higala dinhi nga sila si Marta, Maria, ug ilang igsoon nga si Lazaro nga gibanhaw ni Jesus ug maoy rason kon nganong daghan ang midangop kang Jesus. Gipakuha niya ang duha sa usa ka asno nga iyang sakyan. Aduna siyay laing gikasabot didto nga maoy pananghiran sa duha. Nakasabot kining tulo sa gipahimo ni Jesus ug nagkasabot Binasi sa Isaias 50:4-7; Salmo 22; Taga-Filipo 2:6-11; ug Marcos 11:1-10 sila sa Magtutudlo.

Sa pagsulod ni Jesus, sakay sa asno, sa Jerusalem daghang misugat kaniya nga nagdala og mga lukay nga miila mingsinggit og “Osana”. Dili hingpit ang ilang pagsabot kon kinsa si Jesus. Alang kanila siya usa lamang ka propeta sa umaabot nga mesiyanhong gingharian. Wala sila makakita nga siya na diay ang gihulat. Mao nga kining mga tawhana nga misugat kaniya mao usab nga mibiay kaniya sa dihang gilansang siya.

Gigasahan si Propeta Isaias og maayong pagkabansay nga dila arong maantigo siyang mosulti ngadto sa mga nangaluya. Mao kini ang buhat sa mga propheta ang pagpasabot sa kabubut-on sa Dios ngadto sa mga tumutuo aron magmatinumanon sila sa ilang kasabutan tali sa Dios. Apan wala magpabilin dinhi ang Dios. Nahimong tawo ang iyang bugtong anak ug iyang gihubo ang iyang Diosnong himaya. Makaingon ta nga nakasabot gyod ang Dios sa tawhanong kahimtang kay nahimo gyod siyang tawo gawas sa sala.

Kining pagsabot sa Bag-ong Kasabutan usa ka panaw nga molungtad sa atong tibuok kalibutan. Ang umaabot nga Semana Santa naghatag kanatog daghang higayon sa pagtidlom sa misteryo sa atong kaluwasan. Nagsugod kini Huwebes Santo sa paghugas sa tiil ug paghinumdom sa gasa sa pagkapari nga orden. Moabot kini sa Biyernes Santo diin gisimba si Cristo nga namatay sa krus. Ug mitapos kini sa Bihilya sa Pasko sa Pagkabanhaw diin nabanhaw si Jesus.

Buhong sa mga simbolo ang maong semana. Sabton nato kini aron mahimong buhi alang kanato ang kasabutan sa Diosnong gugma.