Layang dagway

Kanus-a malaya ang usa ka dagway sa iyang alimpatakan, wa siya mahibawo. Inanay lang nagkauphag kini bisan buot pugngan sa kahinugon nga iyaha sa panahon. Ang nahabilin mao na lamang ang tudling sa kadaplinan nga makapahinumdom sa kanhi niining nahimutangan. Apan buhi siya nga daw naghuwat sa pagtukbil sa kawras sa paghandom.

Buhi tuod, kay nagpitik pa

man ang iyang kasingkasing. Apan di na mao ang lagingling sa iyang lanog. Bisan kon moabot ang milagro nga ang mga grano sa dagway manibug-ok sa pagtin-aw lahi na gyud ang hubad sa iyang pagsabot ug pagsud-ong niini. Busa di na siya mangandoy pa sa iyang pagbalik. Bisan ang mga lakang sa mga tiil sa kagahapon kabalikon sa agi.

“Love is always a sunshine,” Matod sa libro nga di matulog.

“If it evaporates it’s no longer itself, but a void.” Puno sa libro nga nagpulaw.

Mahimo tuod nga blangko ang tanan, bisan ang paghandom kon mangluod na ang pagbati. Ang handumanan mahimong usa ka dagway sa sugilanon. Apan di na mosulti ug molihok ang mga karakter bisan sa mga pulong nga di masabtan. Kini ang bugtong rang ikasaysay ug madungog, “Move on, oh, move on!”

Sa ingon niini hugton na lang ang paggunit sa nahabiling mga linya bisan di na ang hinulma sa matuod nga dagway kay dugay na nga nabuni sa panahon ang kasaysayan.

Gitak-upan na niya ang libro. Hanap na sad ang punting sa iyang mga mata. Gikapuyan na siya sa pagbasa kaha aron maka-move on. Nanglit-ad na sa daplin ang mga basahon sa gugma ug kaalam. Sayod siya nga kini sila way kamatayon samtang buhi pa ang ilang mga titik sa iyang pangisip. Kanunayng makig-away ang paghandom sa mga basahon sa higayon sa iyang paghiling ug pagpakli sa ilang mga dahon. Ingon gyud niini ang dangatan kon naa pa ang kalaa sa kapakyasan.

Mitindog si Armando. Ang pag-inusara mipuli sa mga basahon. Buot siyang mogawas aron abi-abihon ang kahilom sa wanang sa kagabhion. Gipamawong na ang mga sugang dagitabnon sa mga silinganan. Ang maaninaw mao na lamang ang mga bituon sa langit. Ingon niini ang kahimtang sa iyang pakigbatok sa kamingaw. Dugay na, nga mosuroy siya nga way tumong panahon sa kagabhion samtang maghambin sa kahaw-ang nga gitingal sa kauphag sa nagkahanawng dagway sa iyang kagahapon.

(KATAPUSAN)