DOBLE ANG SELEBRASYON
Sud sa 12 ka oras, nagbati si Jewellyn “Mutya” Capilla sa wala pa manganak sa una nilang liwat sa iyang bana, si Rhodem “Odem” Capilla.
Nakautong pa og kalima si Mutya, apan tungod sa kadako sa bata, wa kini makagawas sa normal nga delivery.
Nakahukom ang mga doktor nga ipaubos dayon ang 28 anyos nga ginang sa emergency Cesarean section.
“Niubos na iyang heart rate mao tong gi-Cesarean ko,” paambit ni Mutya sa Superbalita Cebu.
Alas 10:09 sa buntag niadtong Enero 15, 2018, usa ka mahimsog nga bata ang gipakatawo ni Mutya sa Chong Hua Hospital sa dakbayan sa Mandaue.
Ang bata nitimbang og 7.4 libras.
Una niini, duha ka adlaw sa wala pa manganak si Mutya, gipangagian na kini og dugo hinungdan nga kini nakuyawan ug nagpahiling sa iyang obstetrician.
Apan gipapauli kini sa doktor kay okay pa ang iyang cervix.
Apan nibalik kini sa CHH pagka gabii sa Enero 14 kay kini nagbati na.
Nangadyi siya kang Señor Santo Niño ug sa Birheng Maria nga maayudahan sa iyang pagpanganak.
Siya nisaysay nga nakatug siya sa dihang gi-Cesarean ug gipukaw na sa nars dihang nakuha na ang bata.
“Hala mao nani siya,” ang nasud sa iyang hunahuna dihang nakita ang iyang anak nga usa ka babaye.
Iyang gihulagway ang bata nga lamurot ang aping ug liwat og itsura sa iyang bana nga si Odem.
Sa dihang siya nagsabak, hilig niya ang mokaon og mga pagkaon nga kolor og chocolate o dunay mismo tsokolate. Si Mutya, usa ka administrative staff sa usa ka business process
outsourcing (BPO) sa siyudad sa Sugbo, ganahan kaniadto og lalake ang iyang unang maanak kay pulos mga babaye ang iyang tulo ka mga pag-umangkon.
Niadtong Marso 11, gibunyagan ilang anak nga gipanganlan og Amelia Rei sa Sto. Rosario Parish, siyudad sa Sugbo.
Ang Amelia gikuha sa pangan sa inahan ni Mutya nga si Emelia, apan giilisan lang nila ang unang letra nga “E” og “A” kay gusto nila nga letrang “A” ang mag-una nga pangan sa bata.
Samtang ang Rei kay gikan sa main character sa salida nga Star Wars: The Force Awakens. Apan giilisdan usab nila ang letrang “Y” ngadto sa “I”.
Ang bunyag gidungan sa kasaulogan sa ika 28 nga kasumaran sa adlaw nga natawhan ni Mutya diin ang salosalo gihimo sa ilang ancestral house sa dan Private, siyudad sa Sugbo.