Cebu jr. triathletes nangharos

Nangharos ang junior triathletes sa Cebu sa Alaska Ironkids Philippines - Davao Leg kagahapon sa Davao City.

Nangulo sa kalampusan sa grupo mao si Moira Frances Erediano sa Organique Triathlon Team, kinsa mikampiyon sa girls’ 13-14 division.

Ang estudyante sa Sacred Heart School-Ateneo de Cebu (SHS-AdC) mihuman sa

400-meter swim, 12-kilometer bike ug 3K run nga lumba sulod sa 43 ka mga minutos ug 29.8 segundos.

Laing taga Cebu nga si Cebuana Marielle Estreba maoy miangkon sa ikaduhang luna, diin nabiyaan lang siya og usa ka segundo ni Erediano. Mikompleto sa All-Cebu

sweep mao si Nicole Marie del Rosario sa SHS-Hijas de Jesus, kinsa miangkon sa ikatulong dapit pinaagi sa oras nga 45:35.5.

Si Estreba, kinsa sakop sa Rider Omega Pro, mao unta ang unang mihaw-as sa swim

event apan nagukdan siya ni Erediano sa bike segment.

Sa dinaganay, sikit ang ginukdanay nila ni Estreba ug Erediano apan ang naulahi maoy mas unang nakataak sa finish line.

Sa 13-14 division, ang naghari mao si Clifford Pusing (41:23.7) unya nagsunod sila si Adrian Thomas Dionisio (41:47) ug Irienold Reig Jr. (41:49).

Ningdaog sa boys’ ug girls’ 11=12 divisions mao sila si Earol Belonguil (32:58.9) ug Asia May Celestine Araneta (41:22).

Ang ubang mga ningkampiyon sa laing mga kategoriya mao sila si Carron Paulter Canas (26:27, boys’ 9-10), Chloie Danna Angelil Dairo (27:14, girls’ 9-10), Al Dustin Bersabal (18:03, boys’ 6-8,) ug Eleora Caelle Avanzado (20:34, girls’ 6-8,).