MAGNOLIA 2-0 ANG TINGUHA
Mosuway pagposte og 2-0 nga bintaha ang Magnolia Ang Pambansang Manok Hotshots sa ilang pagpakigharong og balik sa threetime defending champion
San Miguel Beermen sugod karong alas 6:30 sa gabii sa Game 2 sa Philippine Basketball Association (PBA) Finals series sa Mall of Asia Arena.
Ang Hotshots ningbangon gikan sa 20 puntos nga pagkalubong aron pakagingon ang Beermen, 105-103, sa Game 1 sa best-of-seven series niadtong Biyernes sa gabii sa Araneta Coliseum.
“Credit to the players, down by 20 but they didn’t give up. That’s the character na nabuo siguro namin from previous playoffs,” matod ni Magnolia coach Chito Victolero human sa Game 1 sa interbyu sa PBA.ph.
Sayod si Victolero nga dili sayon ang pagbuntog sa 1989 Grandslam winner hinungdan nga kinahanglan nilang mokayod pa og dugang aron maangkon ang labing una nilang titulo gikan niadtong 2014 Governor’s Cup.
Ang Hotshots, nga karon pa nakabalik pagsulod sa finals human nila gipatigbabawan ang 2014 Governor’s Cup, kinahanglan sab motutok sa pagpugong sa higanteng sentro sa Beermen nga si JuneMar Fajardo.
“Para sa ‘kin si June Mar ay 60 t0 70 percent ng San Miguel,” matod sa usa sa mga sinaligan sa Hotshots nga si Marc Pingris apan dili makaduwa ning maong series gumikan kay aduna naangol (ACL) sa semis batok sa NLEX Road Warriors.
Alang kang Pingris, dili sila makalahutay sa Beermen ning maong series kon dili nila malimitahan si Fajardo, kinsa produkto sa University of Cebu (UC) Webmasters.
“Kung mali-limit si JuneMar ng kahit na hanggang sa 30 o 40 percent malaki ang tsansa namin na talunin ang San Miguel sa championship”, dugang ni Pingris.
Sa Game 1, nagtinabangay ang bigmen sa Hotshots pagdepensa kang Fajardo apan nakamaneho gihapon pagmugna og 31 puntos ug 18 rebounds ang lumad nga taga lungsod sa Pinamungajan, Cebu.
Alang sa Beermen, kinahanglan na nilang ilubong sa kalimot ang nahitabo sa Game 1 ug magtutok sa pagtabla sa series.
“Sana we can go back and be more collectively and comfortably know what we were doing para hindi na mangyari uli,” matod ni Beermem guard Alex Cabagnot.
“It’s a best-of-seven series and they played a great game. We just have to go back to the
drawing boards para makita namin yung mga mistakes and the lapses that we had.”
Sama sa naandan, ang Hotshots magsalig na sab og maayo nila ni Sangalang, Aldrech Ramos, Mark Barroca ug Paul Lee.
Gipangulohan ni Sangalang ang Hotshots sa Game 1 pinaagi sa iyang 29 puntos samtang nagkumboya og 29 puntos sila si Ramos ug Barroca.
Si Lee igo ra man tuod nimugna og upat ka mga puntos sa Game 1 apan bisan unsang orasa, puwedeng moulbo ang opensa niini.
Gawas nila ni Fajardo ug Cabagnot, ang Beermen ni coach Leo Austria mosalig sab nila ni Chris Ross, Arwind Santos ug Marcio Lassiter./