Tudloig pangisda

Dear Papa Joe,

Tawga lang ko sa ngalan nga Cyd. Taga Cebu ko pero nia karon sa Egypt isip usa ka DH. Dalaga pa ko sa edad nga 30 ug tulo na ko ka tuig diri.Ang akong problema kay sagad na ni nahitabo siguro sa mga OFW.

Ang akong pamilya kon makapangayo nako og kwarta murag gipamunit nako diri. Wa gani ko kabalo kon di na nako kaya diri dawaton ba kaha ko nila. Kon mangayo maayo kaayo manawag. Pero kon mapadala na nako akong kwarta, di na gani kamao motawag o mo message man lang nga nadawat.

Ako sang mga paryente kay nahimo na ko nilang bati kay usahay mo message tuod ug mangumusta, pero ang ending manghuwam og kwarta walay ilis ilis. Hayahay kaayo akong mga igsuon nga naa ra sa amo way trabaho. Lansis lang nag habalhabal. Pero mao lagi buot huna-hunaon nagsalig lang gihapon sila nako. Unsaon man ko ni nga di sila malain nako? Palihug tambagi ko.

CYD Cyd,

Reyalidad nana nato diri sa Pilipinas. Daghan maka relate ani pero unsaon man, mao man ni ang naandan sa uban. Tinuod gyud na nga kong moundang ka og tabang, mahimo kang bati. Kon mahimo pa gani di ka paminyuon kay hayahay imong mabana mao mabuhong. Mao nay hunahuna sa uban, mahimo ka usahay nga tuburan. Well, dili tanan.

Kon ako pa nimo, prangkahan nimo imong pamilya nga di na magsalig nimo ug maninguha sila. Kay unsa kaha kon mawala na ka, masukamod sila? Hunahunaa na. Naa sad kay kaugalingong kalipay ug ayaw did-i ang imong kaugalingon ana kay wa na ka magkabata.

Ayaw permi hatagi og isda imong pamilya. Hatagi sila og pukot para makat-on sila og pangisda nga sila. Kana lang ug salamat.

PAPA JOE