We have no secret
Gikan ikaw sa simbahan sa Catmon, ang simbahan sa Sogod na sab ang among gibista ni Jimrey. Parehas sa Catmon, tungason sab paingon sa simbahan. Sa luyo sa simbahan giparking namo ang awto. Nabatyagan dayon nako ang ka-solemne pagsulod namo sa simbahan. Namatikdan nako nga morag Katedral sa siyudad ang porma sa altar sa maong simbahan. Dunay mga tawo sa sulod. Nag-ampo nga nagluhod. Dunay nagrosaryo sa mga estasyon nga naa sa mga kilid sa mga lingkoranan sa ibabaw nga bahin.
Nag-ampo sab mig kadyot si Jimrey. Unya, nanghawok mi sa rebulto sa mga Santos ug Santa, ingon man sa Batang si Jesus. Gihagkan sab namo ni Jimbrey si Jesus nga naghigda sulod sa dakong orna. Pagkahuman, nanggawas mi. Apan wa dayon mi mobiya sa simbahan. Gilibot namog suroy ang gawas ani. Ug napunta mi sa taas nga hagdan. Sus, nindot gyud ang lugar sa simbahan. Over-looking kini. Malantaw ang dakong wanang sa dagat ug ang mga sakyanan sa kadagatan. Malantaw sab ang mga sakyanan nga mangagi sa karsada. Sa ubos, makita ang dakong sports complex.
“Nindota ning lugara, uy, Delle. Morag layo ta sa mga kasakit ug problema dinhi.” “Bitaw, no?”
Dunay mga dagkong kahoy sa palibot nga nakadugang sa kahayahay sa lugar. Nanglingkod mi si Jimrey niadtong lingkoranan nga mga bulos sa kawayan duol sa mga dagkong punoan sa kahoy. Misandig ko sa dughan sa akong boyfriend. Iyang gihapuhap ang akong buhok. “Unta forever na ta, Delle.” “Duna pa diay tay forever ron, Jim?” Mitukiki kog katawa.
“Aw, duna pa man tingali. Ang kinabuhi ra sa tawo ang way forever.”
“Bitaw. Way mogamot nato dinhi sa kalibutan.”
“Pero about love, I believe nga naay forever. Kadto rang nagduwa-duwa sa gugma ang way forever.”
Mitarong kog lingkod. Nagpahiyomay mi si Jimrey.
“Seriously, Jim, nangandoy sab ko nga kita gyud ang para sa usag usa.”
Nahilom si Jimrey. Iyang gikuptan ang akong usa ka kamot. Iyang gipisil-pisil. Unya, nahibulong ko kay kalit siyang nauknol, kana bang morag nakalitan siya. Nagtan-aw siya sa direksiyon sa usa ka babaye nga naglakaw paingon sa sulod sa simbahan. Klaro nga nakalitan si Jimrey.
Nakatan-aw kog dugay sa akong boyfriend. Morag nakaila siya sa maong babaye.
(SUMPAYAN)