MEXICAN BAG-ONG HARI SA IRONMAN

Ang Mexicanong si Mauricio Mendez ug Radka Kahllefe sa Czech Republic ang mipagkang sa dominasyon sa taga Australia sa Philippine Triathlon human nila langkata ang titulo sa tagsatagsa ka kategoriya sa pro division sa Alveo Ironman 70.3 sa Azuela Cove sa Davao.

Ang 22-anyos nga Mendez nagkinahanglan una og dobling kayod sa uwahing bahin sa 1.9K swim, 90K bike ug 21K run aron angkunon ang kampiyonato sulod sa oras nga 3:50:32 ug sa samang higayon, iyang napakgang ang pagpanghawod nila ni three-time Philippine Ironman 70.3 champion Tim Reed ug Tim Van Berkel.

“That was a hard battle,” matod ni Mendez nga nakuhaan sa pamahayag sa Spin. ph. “I was in second place until the final 13 kilometers. The effort was just too hard,” dugang sa kasamtangang Xterra world champion.

Si Reed mirehistro og 3:52:26 alang sa second place samtang si Van Berkel milabni sa ikatulong dapit sa oras nga 3:53:45.

Samtang munasaginhawa og dobling paningkamot ang gihimo ni Mendez sa maong lumba, si Kahlefeldt ang mipakita og saktong dominasyon sa women’s pro class.

Gikan sa swim leg ngadto na sa biseklita ug sa dagan, wa gyud mopakita og paglubad si Kahlefeldt ug pirmamenti kining mogitang og 11 minutos nga distansiya aron hingpit niyang maangkon ang iyang ikaunom nga kampyonato.

Nagsunod kaniya si Naomi Washizu sa Japan (4:36:53) samtang ikatulo si Philippine Triathlon champion Dimity Lee Duke sa oras nga 4:30-12.

Samtang si Jorry Ycong sa Omega Triathlon Team maoy mipatugbabaw sa tanang Filipino finishers sa maong kompetisyon nga may oras nga 4:24:15 ug gisundan nila ni Agusto Benedicto (4:25:02) ug Banjo Norte (4:25:07).