ROCKETS MIBUAK OG FRANCHISE RECORD
Sa 59-14 nga baraha ang Rockets karon maoy pinakadaghan og daog kasaysaysan sa team
Nakabuak og kaugalingon nilang rekord ang hosts Houston Rockets human nila gipangmakmak ang New Orleans Pelicans, 11491, kagahapon sa National Basketball Association (NBA).
Ang kadaugan, nga maoy ikawalong sunodsunod nga naposte sa Rockets, nakapasaka sa ilang rekord ngadto sa 59-14 diin naapsan na niini ang 58 ka mga daog sa regular season nga natali sa 1993-94 champion Rockets squad.
Sama sa naandan, ang Rockets gipangulohan na sab sa ilang lider nga si James Harden, kinsa nagpakatap og 27 puntos sulod lang sa tulo ka quarters.
Aduna pa’y laing upat ka mga magduduwa ang Rockets nga nakamugna og dobleng numero nga puntos, timailhan lang sa ilang panagtambayayong isip usa ka puwersa.
Nidugang og 19 puntos si Eric Gordon alang sa kadaugan, nitampo og 18 si Clint Capela, niamot og 16 puntos si Ryan Anderson samtang nihatag og 14 puntos si Gerald Green.
Alang sa Rockets, wala ra nila hatagi og gibug-aton ang ilang pagbuak sa kaugalingon nilang rekord ug mas nagtutok sila nga makabaton pagbalik og kampiyunato.
“It was just another win. We have high expectations for one another,” matod ni Gordon.
Alang kang Harden, wala sila’y plano nga molugak bisan naglabaw sila og dakodako sa inilugay sa overall standing nga nagtangag og bintaha nga homecourt advantage sa kinatibuk-ang playoffs.
“The edge is going to be there no matter what. We haven’t done anything. We don’t have time to relax,” matod ni Harden.
Pagsugod pa lang sa kombati, ningsulbong na ang opensa sa Rockets ug pagsugod sa 4th quarter, ningburot na sa 92-63 ang ilang labaw.
Ang Pelicans, nga ningkombati sa ikalima nilang duwa sulod sa pito ka mga adlaw, tatawng naapektuhan na sa kahago ug wala sila’y ikabuga sa puwersa sa Rockets.
“I don’t want to use that as an excuse,” matod ni Pelicans coach Alvin Gentry.
“I do think we were a little tired and we got off to a rough start and this is not a team you want to get off to a rough start with.”
Ang Pelicans, nga nangahagsa sa 43-31 nga rekord, gipangulohan ni Anthony Davis pinaagi sa iyang 25 puntos.
Sa laing mga duwa, ningdaog ang Philadelphia 76ers batok sa Minnesota Timberwolves, 120-108, Detriot Pistons batok Chicago Bulls, 117-95, Orlando Magic batok Phoenix Suns, 105-99, LA Lakers batok Memphis Grizzlies, 100-93, ug Charlotte Hornets batok Dallas Mavericks, 10298./AP,
RECORD BREAKER.
Ubos sa pagpangulo sa beteranong si James Harden, ang Houston Rockets karong tuiga misulbong og maayo nga maoy hinungdan nga nabuak ang ilang kaugalingong franchise record nga pinakadaghan og daog sa usa ka season.