BARGAYO PALANSANG SA TUBURAN
Kon maayo lang ang kondisyon sa panglawas, ang 58-anyos nga si Gilbert Bargayo niingon mopadayon sa iyang panaad nga magpalansang sa krus matag Biyernes Santo.
"Basta makaya lang sa lawas, ako ning buhaton," sulti ni Bargayo sa Superbalita sa Cebu.
Karong Biyernes Santo, Marso 30, timaan sa iyang ika25 nga pagpalansang sa krus ug kini ipahigayon sa plaza sa lungsod sa Tuburan sulod na usab sa miaging lima ka tuig.
Si Bargayo, lumad nga taga dakbayan sa Carcar, unang nagpalansang didto sa dakbayan sa Tacloban dihang nagpangidaron og 30 anyos aron pagtuman sa iyang nagbalikbalik nga damgo niadtong 15 ngadto sa 17-anyos pa.
Gikan sa Tacloban, nakapalansang na siya sa Cainta, Rizal, Carcar, dakbayan sa Sugbo ug uban pa nga dunay modapit kaniya.
Ug nakapatukod na siya og kapilya sa Sityo Mabugnaw, Baranay Guadalupe, Carcar tungod sa mga donasyon nga iyang nadawat.
Sa pagkakaron, mogahin siya gikan sa mga donasyon aron pagpa-renovate sa naasoy nga Kapilya, lakip sa pagpahimo og Learning Center sa mga bata sa susamang dapit.
Gipasabot ni Bargayo nga walay sagol nga 'pagtuotuo' ang iyang pagplansang sa krus gawas sa paghimo og drama sa mensahe sa kataposang pito ka mga pulong sa Ginoo ibabaw sa krus aron mas mabati ug masabtan sa mga magtutuo ang pag-antos ni Kristo.
"Sama lang gud ko sa usa ka aktor..," dason niya.
Sa habig sa Tuburan, si Bargayo niingon nga kabahin kini sa programa sa turismo sa lungsod aron maila sa nasod ug tibuok kalibotan sa kaanindot sa dapit.