Cemfed gilusad sa Ikatulong Distrito sa lalawigan sa Sugbo

Lokal nga mga opisyal sa ikaduha, ikatulo, ikaupat ug ikapitong mga distrito sa lalawigan sa Sugbo ang mipakita og suporta sa pag-usab sa sistema sa panggobiyerno sa nasod.

Napuno sa mga opisyal, barangay leaders ug molupyo ang gym sa Cebu Technological University sa lungsod sa Tuburan dihang gilusad ang Cebuano Movement for Federalism Inc. (CeMFed) sa ikatulong distrito kagahapon nga gipangulohan ni Tuburan Mayor Democrito Diamante.

Moabot sa 4,000 ka mga tawo ang niapil sa joint oath taking nga gikan sa upat ka mga distrito sa lalawigan.

Nitambong usab ang mga mayor nga sila si Mary Therese Cho sa Cordova, presidente sa CeMFed; Ronald Allan Cesante sa Dalaguete, bise presidente; Jose Esgana sa Sta. Fe; Carmencita Lumain sa Badian; Beatriz Caburnay sa Alcantara; Rene Asentista sa Dumanjug ug mga opisyal sa siyudad sa Bogo.

Si Danilo Lim, pangu sa Metropolitan Manila Development Authority ug national president sa National Movement for Federalism Inc., maoy nagpapanumpa sa bagong mga sakop sa CeMFed.

Si Diamante nipili sa Tuburan nga maoy pahigayonan sa joint launching ug niawhag sa mga tawo nga nanambong nga suportaan ang tinguha ni Presidente Rodrigo Duterte nga himuong pederal ang porma sa panggobiyerno sa tibuok nasod.

“Kay ang Tuburan, tuburan na diay sa pederalismo,” sumala ni Diamante.

Siya nipasabot sa mga tawo nga kon mausab na ang pederalismo ang nasod mahimo nang 60 to 40 pabor sa local government unit ang madawat nga bahin sa internal revenue allotment gikan sa 40 to 60 nga sharing tali sa nasudnong kagamhanan.

Ang launching sa CeMFed unang gihimo sa ikaunom nga distrito sa lungsod sa Cordova niadtong Enero ning tuiga ug gisundan sa unang distrito sa siyudad sa Naga sa miaging buwan.

Matod ni Diamante sunod himuon ang launching sa ikalimang distrito diin gusto ni Danao City Mayor Ramonito “Nito” Durano lll nga si kanhi senador Aquilino “Nene” Pimentel mismo ang mangunay pagpasabot unsa ang pederalismo ug unsay kaayohan nga mahatag niini sa mga LGU ug katawhan.

Si Diamante nidugang nga bisan og unsa pay kolor sa pulitika sa mga gustong moapil sa ilang grupo, andam sila modawat.

“Wala man tay gitan-aw nga partido as long as nituo og pederalismo,” dugang sa mayor.

Si Davao City Councilor Danilo Dayanhirang, presidente sa Philippine Councilors' League (PCL) national chapter, usa sa mga namulong sa kalihokan, niingon nga nagtinguha ang Consultative Committee nga gitahasan pag-review sa pag-amendar sa Constitution, nga moduso og report niini ngadto kang Presidente Rodrigo Duterte sa ikatulong State of the Nation Address (Sona) karong Hulyo ing tuiga.