Pag-isyu sa deputation order giistrikto sa LTO

Gipaistrikto ang mga lagda sa pag-isyu og deputation order sa Land Transportation Office.

Si Victor Caindec, director sa LTO 7, nibutyag nga ubos sa guidelines sa Law Enforcement and Traffic Adjudication Service (Letas), dunay nalatid nga mga kwalipikasyon kon kinsa ang mamahimo maisyuhan og deputation order sa LTO aron mahimo nga deputized agents.

Pinaagi sa deputation order, ang usa ka kawani sa gobyerno nga maisyuhan niini mahatagan og gahom gikan sa LTO aron makasakmit og mga lisensiya ug maka-impound og mga sakyanan pinaagi sa iisyu nga temporary operators’ permit.

Matod ni Caindec nga ang usa ka personnel nga girekomendar sa iyang labaw nga himuong deputized agent kinahanglan usa ka regular nga empleyado sa gobyerno ug dunay accountability sa Civil Service Commission (CSC).

Sigon sa director kinahanglan nga duna usab clearance gikan sa Office of the Ombudsman kay di tugotan mahimong deputized agent ang usa ka kawani sa gobyerno nga dunay kaso.

Si Caindec niingon nga dugang mga buhatan sa gobyerno kansang mga empleyado ang ilang naisyuhan og deputation order.

Karong bag-o, ang mga port police sa Cebu Port Authority ang ilang naisyuhan og deputation order.

Siya nidugang tanang mga pulis nga girekomendar sa Cebu City Police Office, Mandaue City Police Office, ug Lapu-Lapu City Police Office ang duna nay deputation order gikan sa ilang buhatan.

Naghuwat na lang sila sa final nga listahan sa Cebu Provincial Police Office kon kinsa ang gi-designate nga mga traffic police diin matag lungsod dunay tulo hangtod sa upat ka pulis ang itudlo, mag-agad sa provincial director.

Nag-estoryahanay na sila ni Police Regional Office (PRO) 7 Director Robert Quenery pipila ka adlaw dihang nilingkod kini sa pwesto ug target nila nga tanan ipa-deputize nga mga pulis ang mahatagan og deputation order, apan mag-agad kon makapasar sa rekisitos.

Nagpaabot usab sila sa listahanan nga iduso sa airport police sa Task Group Visayas sa military, Mactan Cebu International Airport, Department of Public Works and Highways ug Department of Environment and Natural Resources aron makadakop kini sa mga makalapas sa lagda batok polyuson ug ubang balaod nga manalipod sa kinaiyahan.

“But we will not give it to them nga dili nila i-request kay wala man tay basehan kinsa ang atong tagaan,” dugang ni Caindec.

Bahin sa Task Force Alpha, ang mga sakop lang niini nga regular nga mga kawani sa gobiyerno ang mahatagan kon dunay rekomendasyon sanglit kadaghanan niini gikan sa pribadong sektor ug way accountability sa gobyerno.