Study center sa Poblacion Pardo giablihan
Naandan na ni Elaine May Tabura, 21, nga matag human sa iyang trabaho, moadto sa Dr. Jose Rizal Public Library sa Osmeña Blvd. aron magtuon ug mangandam sa eksaminasyon alang sa iyang pangandoy mahimong doktor.
Kagahapon, mikuha siya og National Medical Admission Test (NMAT), usa ka nationwide nga eksaminasyon nga gikinahanglan aron makasud sa bisan asang medical
school sa Pilipinas.
Si Tabura, nigradwar pagka
medical technologist sa Cebu Velez College ug kanunay kini magtuon sa labing unang
public library sa dakbayan sa Sugbo nga layo gikan sa ilang panimalay sa Barangay Poblacion Pardo aron makapasar sa NMAT.
Karon, di na kinahanglan mobiyahe og layo si Tabura kay duna nay bag-ong lugar diin siya makatuon human gibuksan ang labing unang study center sa siyudad nga nahimutang sa Barangay Poblacion Pardo, duol lang sa iyang gipuy-an.
Niadtong Sabado giablihan ang study center nga naa na- himutang sa ikaduhang andana sa Pardo Public Market.
Si Cebu City Mayor Tomas Osmeña ang nangu sa kalihokan, kuyog sa iyang asawa nga si Konsehal Margot Osmeña, ug Councilors Joy Augustus Young ug Eugenio “Jun” Gabuya.
Ang study center adunay airconditioned unit, masud ang 100 ka mga estudyante nga magtuon ug pabutangan unya og libre nga wi-fi, matod ni Barangay Poblacion Pardo Konsehal Manolita “Litang” Abarquez, magsilbi nga manager sa study center.
Matod niya nga libre kini alang sa mga tinun-an bisan gikan sa laing mga barangay apan eksklusibo lang alang sa pagtuon, mahimong makahimo og project apan kinahanglan di magsaba-saba.
Dunay dress code nga gisunod ang study center diin di pasudlon ang mga estudyante nga magsul-ob og sleeveless o sobra ka seksi nga senina ug tsinelas.
Si Abarquez nidugang nga tinguha nila nga 24 oras nga abli ang study center labi na kon modagsa ang daghang mga estudyante.
Luwas ang mga tinun-an sa dapit kay naa ra sa ubos sa merkado nahimutang ang Station 7 kun Pardo Police Station sa Cebu City Police Office.
Ang Poblacion Pardo ang usa sa pito ka mga lugar na giplanohan ni Young, chairman sa committee on education sa konseho sa siyudad, nga himuan og study center kauban sa Ramos Public Market (ground floor), T. Padilla Public Market (2nd floor), Taboan Public Market (2nd floor), City Condo (ground floor), building sa Calamba (kanhi barangay hall apan wa magamit) ug 3rd floor sa Cebu City Sports Center.
Matod ni Gabuya nga gihanay na usab nila ang bakanteng lugar sa ilang Barangay Cogon, kasikbit nga barangay sa Poblacion Pardo aron mabutangan usab og laing study center.
Gibuhat kini sa mga opisyal sa kagamhanan sa siyudad sa Sugbo human ilang nakita nga epektibo ang public library nga gihimo na sab karong study center sa libuan na ka mga estudyante sa kolehiyo ug high school.