P12M GASTUHON SA MANDAUE SA KAPISTAHAN
Mokabat ngadto sa P12 milyones ang gitaganang pondo sa kagamhanan sa dakbayan sa Mandaue alang sa Midyear Cultural Summit isip parte sa selebrasyon sa kapistahan ni St. Joseph sunod buwan.
Matod ni Atty. Regal Oliva, city treasurer nga ang P10 milyones sa pundo alang sa nagkadaiyang kalihukan samtang para sa sports activities niini ang P2 milyones.
Saulugon sa dakbayan ang kapistahan niini karong umaabot Mayo 8.
Niadtong Huwebes, gilusad sa kagamhanan ang mga kalihukan sa pista ug gipresentar sab sa mga sakop sa media ang mga kandidata sa Miss Mandaue ug The Mandaue Gay Pageant 2018.
Ang Miss Mandaue 2018 ipahigayon karong Mayo 6 samtang ang Mandaue Gay Pageant karong Mayo 9, nga parehong pagahimuon sa Mandaue Sports Complex.
Gipahibalo sab ni Konsehal Kevin Cabahug nga karong Abril 29 buksan ang City Fiesta Olympics diin ang mga paugnat sa kusog nga abli sa kompetisyon mao ang volleyball, basketball, tennis ug arnis.
Gipahibalo sab ni Oliva nga pipila ka mga kalihukan sa mga nangaging tuig sama sa koronasyon sa Queen, Prince and Princes, Gugmang Giatay Bisrock Musical, pulihan og mga “mopatok” nga aktibidad.
Ibalik sab sa city hall ang Palengke Queen ug Miss gay Jurassic nga himuon karong Abril 29 ug Mayo 5.
“We are putting them back due to public demand,” sigun ni Oliva.
Sa iyang pakigpulong, si Bise Mayor Carlo Fortuna nangkanayon nga atngan gyud sa mga Mandauehanon ang mga kalingawan sa mga aktibidad ning tuiga.
Si Atty. Mae Elaine Bathan, executive secretary ni Mayor Luigi Quisumbing, niingon nga ilang ipatuman ang pag-obserbar sa election ban sa mga kalihukan.
“We are deploying eco-wardens and eco-enforcers so that while we are having fun we are still taking care of our policies and surroundings,” ni Bathan.
Giawhag niya ang publiko nga di magpataka og labay sa ilang basura sanglit ang mga kasamtangang balaud ug ordinansa ipatuman man sa kagamhanan. /