KASAGRADO SA BALOTA PANALIPDAN

Ang Cebu Provincial Commission on Elections (Comelec) nipahimangno sa mga botante labot sa dili pagdala og cellphones o cameras ug pagkuha’g hulagway samtang mobotar atol sa barangay ug SK elections sa Mayo 14.

Tinguha sa Comelec nga maprotehian ang kasagrado sa mga balota nga mahukmanon sa pagpili sa mosunod nga opisyal sa ba barangay.

Moabot sa dul-an tulo ka milyon ka mga botante ang dinhi sa Sugbo ang gipaabot nga modagsa sa nagkadaiyang presinto lukop lalawigan sa barangay ug SK elections sa Mayo 14.

Tungod sa pagkauso na sa mga electronic gadget ug sa social media, dili kapugngan nga dunay magdala sa ilang mga cellular phone ug mokuhag hulagway sa ilang pagsalmot ning lain na usab nga political exercise sa nasud.

Subay niini, nipahinumdom si election officer Ferdinand Gujilde sa limitasyon sa mga botante sa paggamit sa ilang mga kahimanan.

Mahimong magdala og camera sa polling center apan gidili ang pagkuha og hulagway sa balota kay gustong masiguro sa Comelec ang secrecy and sanctity sa botasyon.

Sa 2016 elections, nakontrobersiyal ang pipila ka mga artista ug uban pang indibidwal human sa pagkuhag hulagway sa ilang mga gi-fill-up-pan nga balota ug gi-upload diha sa social media.

Sigun sa Comelec, mahimong kompiskahon sa Electoral Board (EB) ang mga kahimanan nga dala sa mga botante kon gamiton kini pagkuha ug mga hulagway sulod sa presinto.

Pahinumdom sa Comelec nga limitado ang mga tawo nga mahimong makasulod sa mga polling center.

Gawas sa EBs ug mga botante, mahimong makasulod sa presinto ang mga watchers ug accredited nga mga sakop sa lokal, national ug international media.