Mandaue City Hospital giayo apan serbisyo padayon

Nakahasol apan padayon gihapon ang operasyon sa Mandaue City Hospital bisan wa pa nahuman ang renovation sa maong tambalanan.

Kini may gibutyag ni Dr. Maria Lourdes Espinosa, pangulo sa maong tambalanan sa dihang nahinabi sa mga tigbalita.

Sigun ni Espinosa nga usa sa nakalangay mao nagkalainlain ang pagtrabaho sa 2-phase renovation human niganti ang Department of Health (DOH) og dugang pundo sa pag-ayo sa ospital.

Nalangay sab ang pagtrabaho sa phase one nga mao ang pag-usab sa atop niini.

Nasuta ning mantalaan nga tungod sa dugang pondo sa DOH, i-renovate ang tibuok ospital ug ang ward sa ospital didto na unya mahimutang sa luyong bahin niini diin didto tukoron ang upat ka andana nga building.

Matod ni Espinosa nga anaa sa mga P50 milyones ang pondo nga gitagana sa pagpausab sa tambalanan gikan sa DOH.

Sigun ni Espinosa nga panahon na unta nga sugdan ang ikaduhang phase sa renovation apan nalangay ang phase 1 og human nga gikatakda untang mahuman niadtong Lunes.

"It was re--roofing only but DOH granted us enough money for us to renovate the whole hospital and the ward portion will be a four storey building at the back. And there was variations of the building. Because at first it was only the reroofing, but they have to make a variation of the renovation of the whole hospital,” matod ni Espinosa ning mantalaan kalabot sa pagkalangay.

Nanghinaot si Espinosa nga mahuman ang pagtrabaho sa phase 1 sa di madugya ug ang kinatibuk-ang renovation ning tuiga.

“Ang among plano sa city hospital is to focus on primary care and emergency care and to provide some services that maybe a little to expensive sa private sector,” matod ni Mayor Luigi Quisumbing sa mga tigbalita.

Giangkon niya nga nalangay gyud ang pagtrabaho ug iyang gihangop ang possibilidad nga adunay mga hagit nga naagian ang kontraktor sa pagtrabaho niini.

Hinuon, masaligon ang mayor nga dalion sa kontraktor ang pagtrabaho sanglit kini man ang accredited kontraktor sa DOH ug ang maong ahensya nipasalig sa dakbayan nga mapapaspasan ang trabaho niini.