‘Yabo-yabo’ nasakpan sa akto sa LTFRB sa Mandaue City

Modus sa mga kolurum nga van nga gitawag og “yabuyabo” naaktohan sa Land Transportation Franchising and Regulatory Board (LTFRB) sa dakbayan sa Mandaue niadtong Huwebes.

Nasakmit ang usa ka kolurum nga van ug usa ka rehistradong GT express van human masigpati nga ilegal kining nagpabalhin og mga pasahero gikan sa rehistradong GT van paingon sa usa ka kolurum nga van.

Sa Facebook post ni LTFRB-7 Director Ahmed Cuizon, makita ang duha ka video diin gipabalhin ang mga pasahero gikan sa rehistrado paingon sa kolurum.

Ang maong van gikatahong gikan nanguha ug pasahero sa Cebu North Bus Terminal samtang ang kolurum nga pribadong van nagpaabot sa usa ka gas station sa dakbayan sa Mandaue, kon diin sila masakpi.

Matod ni Cuizon nga ang “yabu-yabo” usa ka illegal nga operasyon diin ang usa ka rehistrado nga GT express van mokuha og pasahero gikan sa Cebu North Bus Terminal ug ipasa kini sa laing kolurum nga van inig abot sa dapit nga ilang gikasabutan aron makabalik dayon ang rehistrado nga van sa terminal.

Tungod ning pamaagi, usa ra ka rehistradong van ang gikinahanglan sa operasyon ug mapalapdan na nila ang ilang ginansya gamit ang mga kolurum nga sakyanan.

Matod ni Cuizon mao kini ang unang higayon nga nasakpan nila ang maong operasyon sa akto.

Si Cuizon mihatag og pasidaan sa mga operators nga padayon pa sa pagpangulurom.

“..Ug nangolurum na sila, hinaot nga mangundang na sila kay moabot gyud ang adlaw nga maapsan na namo sila ug madakpan na namo sila, dili lang kay ma-penalize sila naa pa’y posibleng criminal charges nga ma-file nila labi nag naay disgrasya nya dili sila kabayad sa insurance.”

Sa pagkakaron, ang duha ka sakyanan anaa sa impounding area kon diin i-impound kini sulod sa tulo ka buwan og pabayron kini sa penalty nga P200,000.