Hunonga nang lalis

Ning nakalabay nga mga adlaw, subli na usab nga gilalisan kon unsay maayo, Bus Rapid Transit (BRT) o ang Light Rail Transit (LRT). Taliwa sa mga lalis nila ni Cebu City Mayor Tomas Osmeña ug Presidential Assistant to the Visayas Michael Dino, namahayag si Socioeconomic Planning Secretary Ernesto Pernia nga angay nang ipatuman ang BRT tungod kay napahigayon na ang mga pagtuon niini ug uban pang gikinahanglan niini alang sa pagpatuman.

Bitaw, samtang nag-antos ang mga lungsoranon sa kahimtang sa trapiko kada adlaw, nagsige pag lalis ang duha ka mga kampo, asa ang mas maayo, BRT o LRT ba. Maora bag nasunog na ang usa ka balay, naglalis pa asa magsugod sa pagpasirit.

Naa na ang problema sa trapiko. Dugay nang nag-antos ang mga Sugboanon niini, labina kadtong nagpuyo sa Metro Cebu.

Sama sa wa pay kahayag nga nakita ang mga Sugboanon sa pagsulbad sa suliran sa trapiko, kay gani, nagkagrabe kining mao nga suliran. Samtang ang uban nangreklamo, ang ubang mga netizen nangaanad na lang kay mao na kini ang inadlaw nilang kasinatian.

Sama sa Banilad-Talamban road nga lakip sa lagbasan sa BRT, grabe ang kasinatian sa trapiko sa mga lumolupyo sa mao nga dapit. Milagro nang adlaw nga moluag ang trapiko.

Busa nagkinahanglan og kasulbaran kining mao nga suliran. Di lalis.

Kon unsay mas dali nga solusyon nga ipatuman nga dunay dan nga makapaluag sa trapiko bisan kon temporaryo lang, angay nang ipatuman. Kon ang LRT mas dali kay public-private partnership o ang BRT andam na kay nahuman na ang tanang mga rekisitos, kini ipatuman na.

Kon ang BRT mao diay ang mubo ug temporaryong sulusyon, kini angay nang ipatuman ug idugang ang LRT nga mas lapad ang mga dapit nga agian. Kapoy na sige og lalis.