Pilay ila kaha?
Gipasi-atab ug gipasigarbo ni Gov. Hilario Davide 111 ang mga bag-ong light and heavy equipment nga napalit sa Kapitolyo karong bag-o. Mipalit pa ang Kapitolyo og full page sa tanang local newspapers aron ipatik ang iyang advertisement. Diha ang iyang litrato ingon man kang Vice Gov. Agnes Magpale ug sa mga sakop sa Hunta Probensiyal. Angay pa ba gyud nang ipanghambog? Nganong wala na man lang gyud mopagawas ug press release ang Kapitolyo? Namalit pa man gyud og newspaper space. Nag-usikusik lang sa kuwarta sa mga magbubuhis.
Gibutang pa didto sa maong full page ad nga dako kaayong tabang ang maong mga ekipos labi pa sa kalungsuran aron pag-abli og bag-ong mga kalsada ug pag-ayum-ayum sa mga gubaon. I-dispatch ang maong mga ekipos sa kalungsuran aron dali ang pag-mobilize niini labi pa kon dunay mohapak nga kalamidad.
Kahinumduman, mi-loan sa bangko ang Kapitolyo aron ipalit sa maong mga ekipos nga mikantidad og P227 million. Nahimong kontrobersiyal ang unang bidding gumikan kay ang gipadaog sa Bids and Awards Committee (BAC) nga gipanguluhan ni Provincial Administrator Mark Tolentino mao man ang highest bidder nga ConEquip. Asa ka makakita ana nga ang highest bidder maoy gipadaog? Only in the Philippines.
Gumikan sa maong kontrobersiya, gidiskasi sa gobernador ang maong bidding ug gipa-rebid. Ang midaog ang consortium na sa ConEquip ug Rdak. Mao na kana ang mga equipment karon. Pila gyud kahay nasapi anang mga karaho nunot ning maong transaksiyon?Klaro man kaayo nang overpriced ba. Matag transaksiyon god sa gobiyerno naa man gyud nang komisyon ug SOP. Namahin kaha si Gov. Davide sa uban o iya lang gisolo? Wala ko mangakusar. Nangutana lang. Nagduda man gani ko nga fund-raising na kini sa gobernador alang sa sunod tuig nga eleksiyon.
Hinuon, makatabang gyud ang maong mga ekipos ngadto sa kalungsuran. Pero atong tanawon kon makabenipisyo ba o makagamit ba ang ubang mga local government units niini labi pa gyud tong mga mayor nga dili kaalyado sa gobernador. Bantay baya og dili ma-areglo ang atong mga kalsada sa lalawigan.