Feasibility study sa BRT ug LRT

Usa sa mga gilalisan labi na diha sa Facebook mao ang kabahin sa mga feasibility study sa Bus Rapid Transit (BRT) ug sa Light Rail Transit (LRT) nga giduso ni Presidential Assistant Mike Dino.

Ako lang klaruhon daan nga akong baruganan mao ang pagsuporta sa BRT, LRT, kanang proposed nga subway ug mga underpass. Kay basin dunay masipyat nga molalis sab nga kontra ko sa LRT kay pabor sa BRT.

Alang kanako, hinanggaw man kining mobatok sa BRT kay mas maayo ang LRT. Ang trapik tungod sa pagtukod unya sa BRT mosud lang og mga duha ngadto sa tulo ka tuig. Ang pagtukod sa LRT kay moresulta og trapik sulod sa 10-15 ka tuig.

Dayon, grabing tyabaw batok sa trapik sa underpass sa usa ka eskina sa Mambaling. Gigamit pa ang trapik sa pagbatok sa mga proyekto nga mga underpass ni Kong. Raul del Mar. Apan way eek sa giplanong subway anha mismo sa central business district kun downtown sa Syudad sa Sugbo.

Karon, magsigig balik-balik ang mga minion sa OPAV lakip na ang mga troll nga pabor sa LRT nga gitagoan kuno ang feasibility study sa BRT.

Apan atong nahipos gikan sa City Hall nga gihatagan mismo og kopya sa feasibility study ang kandidato sa pagka mayor ni OPAV nga si Vice Mayor Edgar Labella.

Nangayo og kopya sa feasibility study ang Konseho sa miaging tuig pa. Dayon naay pruweba nga gihatagan si Vice Mayor Edgar Labella. Gidawat kini sa opisina ni Labella sa Oktubre 27, 2017.

Alang sa research sa OPAV, pangayo lang og kopya kang Vice Mayor Labella. Makasurpresa lang nga hangtod karon, wa pa gyuy baruganan nga gipadayag si vice mayor kabahin sa BRT. Nahadlok siya nga nangasuko na ang mayoriya sa mga Sugboanon niining pagbabag ni Dino?

Balik sa feasibility study, di ko motuo nga way kopya ang OPAV. Kon wala, mangayo sila ni Labella. Di na unta sila magpa-goryo-goryo nga wa makahibawo nga di na makabyahe ang mga PUJ sa ruta sa BRT.

Sa pikas bahin, kataw-anan ang OPAV nga nagduso niining LRT project sa usa ka consortium. Usbon ko nga wa koy supak apan tabangan unta ni OPAV ang mga proponent.

Pananglitan, dapat siguruon sa OPAV nga mo-submit na gani og proposal ngadto sa Department of Transportation (DOTr), dunay feasibility study kini.

Apan nitug-an ang usa ka opisyal sa DOTr nga giuli ang proposal alang sa LRT nga dunay subway kay wa lagiy feasibility study.

Simple lang atong tambag sa mga kontra sa BRT.

Una, naay kopya sa feasibility study si Vice Mayor Labella. Moundang unta siyag hupohupo ug tabangan ang OPAV aron mahan-ay ilang oposisyon. Sayon ra man gud nga masupo.

Ikaduha, dali-a na inyong feasibility study sa LRT.

Ikatulo, kon suporta man kaha mo sa LRT nga dunay subway sa downtown area, ayaw na lang sab patugatuga og batok sa mga underpass project karon.