Foolish heart
Kinsa man say di mahibulong, bi? Sa tanaw ko kanila ni Eduard ug Edna, mora silag naglalis. Makita man sa nawong ni Eduard nga nasuko, ug si Edna sab, nagsigeg pamahid sa iyang mga mata, klaro kaayo nga naghilak siya.
Bisag nasuko si Eduard sa akong paniid niya apan morag nagpasabot siya kang Edna.
Wa ko modayog sulod sa kan-anan. Naniid pa gyud ko. Di ko madungog ang giestoryahan sa duha apan sa reaksiyon ug aksiyon nila, matataw nga wa gyud sila magkasinabtanay. Duna gyud silay problema sa usag usa.
Mipasalipod ko sa usa ka haligi dihang mitindog si Eduard ug gibiyaan si Edna. Nagpabiling naglingkod si Edna, wa mosunod kang Eduard. Unsa kahay ilang giawayan, no? Nakaingon ko sa hilom. Unya mipakibo na lang ko sa akong mga abaga. Unsay akong labot. Nagyawyaw ko nga mibiya sa akong gitindogan. Layo na ang nalaktan ni Eduard. Di na ko niya makita. Sa laing fast food ko mokaon og hamburger.
Wa dayon ko makatulog anang pagka gabii. Mao ray akong gihunahuna sila si Eduard ug Edna. Unsa gyud kahay ilang problema? Di ko na unta gusto nga hunahunaon ko ang akong nakita nilang duha kay wa man koy labot sa ilang kinabuhi labi na sa ilang relasyon. Apan ambot ba sab, uy, nga mahunahuna ko man gyud sila?
Lawom nang gabii nga nakatulog ko. Pagmata ko anang pagka buntag, kapoy ang akong lawas. Naglagot na nuon ko sa akong kaugalingon. Unsaon, gihatagan ko mag panahon sa paghunahuna sila si Edna ug Eduard nga kon buot gyud hunahunaon wa man koy labot kon unsay nahitabo sa ilang relasyon?
Human kog kaligo ug nakapamahaw na sab, nagpahayahay ko sa among lawn ubos sa landong sa Persian mango. Buntag pa gani apan sakit na ang kainit. Aw, summer na man gud. Ting-init man gyud ning panahona. Laay kaayong isuroy sa gawas.
Unya mitingog ang call alert sa akong selpon. Gisusi ko dayon. Si Edna ang nanawag.
“Hello, Ed. Morag importante ning imong tuyo nako, da, kay buntag pa man nanawag ka na?”
“Tinuod, Ren. Importante gyud. Magkita ta ron sa Mang Inasal sa Colon.”
Namatikdan nako nga naghilak si Edna.
(TAPUSON SUNOD GULA)