Anak nga lalake

Nagdali si Vic nga naglakaw sa dalan kuyog si Eva nga mananabang sa ilang dapit. Naghinamhinam na siya nga makakita sa umaabot nga anak kay nangandoy siya og anak nga lalake. Napulo na ang iyang mga anak, apan pulos babaye. Giatiman dayon ni Eva ang iyang asawa.

“Luwas na imong Misis,” pahibalo ni Eva. Apan nahisagmuyo si Vic pagkasayod nga babaye gihapon ang gihimugso ni Dina. Naglibog siya kon unsay angay buhaton aron makaanak og lalake.

Paglabay sa usa ka bulan miadto si Vic sa iyang kumpare nga si Eric ug nagpakisayod unsay himuon aron makaanak og lalake.

“Pre, tabangi ko. Unsay buhaton ko aron makaanak og lalake?” matod ni Vic nga masub-anon.

“Dali ra kana nga masulbad. Aduna koy nahibaw-an bahin niana. Ayaw sab kalimot sa pag-ampo,” tambag ni Eric nga naluoy kaniya.

Dihang nahiuli na si Vic sa ila gipahibalo niya si Dina sa pamaagi aron matuman ang iyang pangandoy. “Kon lalake ang sunod natong anak puwede na ka magpa-ligate.” ni Vic.

“Dili baya lalim ang manganak. Maayo unta’g dako kag suweldo. Kon pwede lang, adto ka magpaanak sa lain!” ni Dina nga wala mahimuot.

Gisunod sa magtiayon ang pamaagi nga gitudlo kanila aron matugahan og anak nga lalake. Miduaw sab sila sa nagkalainlaing relihiyusong lugar-ampuanan.

Wala magdugay nagsabak si Dina. Pag-abot sa adlaw nga manganak na kini wala mahimutang si Vic. Gipaningot siya og bugnaw samtang na- ghulat sa resulta. Migawas ang mananabang gikan sa kuwarto nga seryuso ang dagway ug unya mipahiyom.

“Natuman na imong pangandoy, Vic. Lalake ang gihimugso ni Dina,” matod ni Eva.

“Yes! Sa katapusan may junior na ko!” ni Vic nga nakalukso sa kaipay. Nagpasalamat siya sa kahitas-an kay gidungog ang iyang pag-ampo. Nalipay usab si Dina kay puwede na siyang magpa-ligate ug nakapahuway na sa pagpanganak.

Miligid ang panahon. Nangandoy si Vic nga pasudlon sa ‘military’ ang iyang anak nga si Pio kon makahuman nag eskuyla. Usa ka adlaw gipangutana ni Vic ang iyang anak bahin sa ambisyon.

“Dong, unsay imong pangandoy kon makahuman ka nag kurso sa kolehiyo?” ni Vic.

“Pa, gusto ko nga moapil og beauty contest parehas ni Pia Wurtzbak,” ni Pio dungan sa pagkiay-kiay sa iyang sampot.

Daw nahugno ang kalibutan ni Vic sa iyang nadungog. Dili siya makadawat nga mabayot ang iyang anak nga lalake. Napungot siya ug nagpuot ang iyang dughan. Naglisod siya sa pagginhawa. Dali nga gidala si Vic sa ospital kay giatake sa kasingkasing.

Human makagawas sa ospital nadungagan ang problema ni Vic kay dili na pwedeng manganak

si Dina human magpa-ligate. Gikasab-an niya si Pio.

“Pa, everything happens for

a reason,” ni Pio nga gilugmawan ang mga mata sa luha.

“Pahawa diha! Wala ko kasabot nimo!” singgaak ni Vic.

Nasakitan si Pio sa gipamulong sa iyang amahan ug nagplano nga molangyaw.

Nananghid si Pio sa iyang inahan una molarga sa Manila aron adto didto manimpalad. Tungod kay kugihan, dali nga miasenso ang iyang kinabuhi. Gikan sa pagka beautician nakapatukod siya og kaugalingong beauty parlor nga maoy iyang gihimong panginabuhian.

Paglabay sa panahon si Vic ug si Dina na lang ang nagpabilin sa ilang pinuy-anan human mangaminyo ang ilang mga anak nga mga babaye. Tungod kay tigulang na ang iyang ginikanan nakahukom si Pio nga mopauli sa ilang dapit ug magtugod og beauty parlor.

“Pa, sukad karon ako na ang moalima ninyo ni Mama,” ni Pio nga naluoy sa iyang amahan nga naglingkod sa wheelchair. Di na kini makalakaw ug nahalap.

“Anak, pasayloa ko! Pagbuot sa kahitas-an nga nahimugso ka aron dunay moatiman kanamo sa nahabiling adlaw sa among kinabuhi!” ni Vic nga mikupot sa kamot ni Pio nga gilugmawan sa mga luha ang mga mata.

(KATAPUSAN)